کۆنگرەیەکى کۆنگرەیەکى چۆنمان گەرەکە بۆ یەکێتیەکەمان؟

 کۆنگرەیەکى کۆنگرەیەکى چۆنمان گەرەکە بۆ یەکێتیەکەمان؟

• سەرەتا هەموو حیزبێکى سیاسى وەک بونەوەرێکى زیندوو بەچەندین قۆناغى  گەورەبوون وپێگەیشتن و دواتریش نوچدان و لاوازبوون و تەنانەت مردنیش دەبێتەوە، هەربۆیە پێویستە لەسەر سەرکردایەتى و ڕابەرى هەر حیزبێک هەمیشە لەهەوڵى بە گەنجى و بەهێزى و پتەوى هێشتنەوەى ڕیزەکانى حیزبەکەیدا بێت و هەمیشە بەدیقەتەوە پلانى گەشەکردنى بۆ دابنێت  و چاودێریشى بکات.حیزبى سیاسى بریتیە لە پەیڕەوى ناوخۆ و بەرنامەى تاکتیکى و ستراتیژى و هەڵگرى ئایدیایەکى نوێ و ڕچەو ڕێبازێکى جیاکەرەوە لە حیزبەکانى تر و پابەندبونیەتى بە بنەما سەرەکى و کارکردنى بۆ وەدیهێنانى ئامانج و دروشمەکانى و هەوڵدانە بۆ گرتنە دەستى دەلسەڵاتى سیاسى لە کۆمەڵگادا و دواتریش لەو ڕێگەیەوە پیادەکردنى سیاسەت و بەرنامەکانێتى لە پێناو بەردەوامبون و مانەوەى زیاترین کات لەدەسەڵاتدا ئەوەش بە خزمەتکردنى کۆمەڵگاو جەماوەر و لایەنگرەکانى خۆى دەبێت.• حیزبى سیاسى سەرکەوتوو یان سەرکردە و ڕابەر  و سەرکردایەتى بەکۆمەڵى سەرکەوتوش بریتین لەو کەس و لایەنانەى کە بتوانن یەک ڕیزى و یەک گوتارى حیزبەکەیان بپارێزن و تۆکمە و پتەو ڕایبگرن ئەوەش بە ناوەندێتى لە بڕیاردان و ڕاوێژکردنى بەردەوام و کارى دەستەجەمعى دەبێت نەک تاکڕەوى و دیاریکردن و دابەشکردنى دەسەڵاتەکانە بەسەر هەموو ئۆرگان و کەسەکاندا و دواتریش پابەندبونە بە بەند و مادەکانى پەیڕەوى ناوخۆ و جێبەجێکردنى بنەماى سزا و پاداشتە.• هەروەها بۆئەوەى حیزبى سیاسى و کادر و لایەنگر و ئەندامانیشى لەسەرەوە بۆ خوارەوە هەمیشە لەگەڵ گۆڕانکارى و ڕەوت و پێشهاتەکاندا بەرەو پێش بچن گەرەکە هوشیارى سیاسى و ئابورى و کۆمەڵایەتیان لەگەشەکردنى بەردەوامدا بێت و کارى خۆڕۆشنبیرکردن و پێگەیاندنى کادرى هوشیار ئەرکى حیزب و سەرکردایەتیەکەیەتى. چونکە هیچ حیزبێکى سیاسى گەورە یان بچوک وبەرەوپێش ناچێت بەبێ بوونى کادرى هوشیار بە زانست و مەعریفەى نوێى سەردەمیەوە،چونکە چەقبەستن و دۆگمابوونى بیر و عەقڵى کادر دەبێتەهۆى دواکەوتن و پوکانەوە و مردنى حیزبى سیاسى.• هەروەها حیزبى سیاسى گەرەکە هەمیشە زیندوێتى خۆى  ڕابگرێت و تواناى دەستپێشخەرى سیاسى لەدەست نەدات،چونکە هەر حیزبێک نەیتوانى بەبەردەوامى کارى چاکسازى و نوێبونەوە لە عەقڵ و جەستە و بیر و ڕێبازى خۆیدا بکات ئەوا بەدڵنیایى دەبێتە پاشکۆ و بەرەو لاوازى و پوکانەوە دەچێت.• ئاشکراشە کارى گۆڕانکارى و چاکسازى و نوێبونەوە لە ناو هەر حیزب و تەنانەت ڕێکخراوى مەدەنى و گروپ و چالاکوانە هونەرى و زانستى و پیشەکانیشدا بەندە بە بەستن و سازدان و چێکردنى پلینۆم یان کۆنگرەى گشتى حیزبەوە، بەبێ گرێدانى کۆنگرەو گۆڕانکارى دەورى و لەکاتى خۆیدا،ئەوا لەلایەک تاکڕەوى و بەرژەوەندخوازى و دیاردەى تەکەتولى ناڕەوا  و قۆرخکارى دەسەڵات و خۆسەپاندن و لەڕێگەلادان سەرهەڵدەدات و لەلایەکى تریشەوە کێشە و گرفتە سیاسى و ئابورى و کۆمەڵایەتى و سەربازى و خزمەتگوزرایەکان  زیاد دەبن و لەقەوارەى ئاسایى خۆیان قەبەتر دەبن و ئەوکاتیش چارەسەر و بنەبڕکردنیان سەخت و دژوار دەبێت، لەهەمان کاتیشدا داواکارى و پێداویستیەکانى تاک و کۆمەڵگاش زیاد دەبن و گۆڕانکاریان بەسەردا دێت، جا بۆ وەڵامدانەوى هەموو ئەو هۆکارانە گەرەکە کە حیزبى سیاسى بەبەردەوامى لە کارو پڕۆسەى خۆ نوێکردنەوەدا بێت لە جەستە و بیر و پلان و عەقڵیەتى خۆیدا کە ئەوەش لە گۆڕانکارى لەکەسەکان لە بەرنامە و پەیڕەوى ناوخۆ و ڕچە و ڕێبازى خۆیدا دەبێت.• لەئێستادا یەکێتى نیشتیمانى کوردستان ،وەک حیزبێکى گەورە و کاریگەرى سەر گۆڕەپانى سیاسى کوردستان و عێراق و ناوچەکەش و تەنانەت دونیاش،گەرەکە کە لەم قۆناغە هەستیار و ناسکەدا کۆنگرەى چوارەمى خۆى ببەستێت،پرسیار لێرەدا ئەوەیە  ئەو هۆکار و پاڵنەرانە چین کە پێویستبوون و زەرورەتى بەستنى کۆنگرەى چوارەمیان کردۆتە باسى ڕۆژەڤ ؟• گەلێک هۆکار بونەتە  دەخوازن کە کۆنگرەى چوارەمى یەکێتى ببەسرێت لەوانە:1. لەدواى کۆچکردنى ڕابەر و دامەزرێنەر و باوکى ڕۆحى هەموو یەکێتى و یەکێتیەکان و کاریزما و هەڵکەوتوى گەلەکەمان و شکۆى نەتەوەکەشمان هەڤاڵ مام جەلال و دروستبوونى بۆشاییەکى گەورە لە جێگە و پێگەى سکرتێرى گشتى یەکێتیدا ،هێندەى تر بەستنى کۆنگرە نەک هەر بۆتە پێویستیەکى حەتمى بەڵکو لەگەڵیشیدا بۆتە مەتڵەبێکى فراوان و سەرەکى سەرجەم سەرکردایەتى و ئۆرگان و ئەندام و لایەنگرانى یەکێتى لەناوخۆى خۆیدا و هەروەها مەتڵەبێکى جەماوەرى کوردستان و تەنانەت حیزب و سەرکردە سیاسیەکانیش.چونکە هەموان باش لە ڕۆڵ و کاریگەرى و گرنگى بڕیارەکانى یەکێتى تێدەگەن و بون و بەردەوامى و بەهێزى یەکێتى بۆ هەموان لە کوردستان و عێراق و ناوچەکەش ماناى ڕاگرتنى بەڵانسى هێز و هاوکێشە ناوخۆیى و ناوچەییەکان و پارێزەرى ئەمان و ئاسایشى گەل و نیشتمان و نەتەوەشە و لەگەڵیشدا پارێزەر و ڕاگرى دۆخ و کەشەوهەواى سیاسى و ودیموکراتى و ئازادیەکانیشە و بەمانایەکى تریش پارێزەرى ئاسایش و ئابورى و ئەمانیشە بۆ هەموان و ڕێگە گرتنیشە لە پاوانخوازى و تاکڕەوى و قۆرخکارى دەسەڵات لەکوردستان و عێراقیشدا.2. نەمانى مەترسى جەنگى داعش لەسەر کوردستان.3. بەداخەوە داگیرکردنەوەى  ناوچە دابڕێنراو و جێگە ناکۆکەکانى کوردستان لەلایەن سوپاى عێراقیشەوە وەک کارەسات و ڕووداوێکى گەورە و کاریگەر کە هەقە خوێندنەوە و هەڵسەنگاندنى ووردى بۆ بکرێت کە ئەمەش کارى کۆنگرەیە، بەستنى کۆنگرەى کردۆتە زەرورەتێکى حەتمى.4. کەڵەکەبوون و بەردەوامى کێشە و ململانێ ناڕەواکانى ناوخۆى یەکێتیش لە چەند ساڵى ڕابووردوودا و بەتایبەتیش لەدواى کۆنگرەى سێهەمەوە،جارێکى تر بەستنى کۆنگرەى کردۆتە کارێکى زێدە هەنوکەیى.5. تێپەڕبوونى زیاد لە 4 ساڵ بەسەر وادەى بەستنى کۆنگرەدا و نەمانى شەرعیەتى ئەم سەرکردایەتى و مەکتەب سیاسیانەى ئێستا،هۆکارێکى ترى بەستنى کۆنگرەیە.6. لەکۆتایشدا ،گۆڕانکاریە گەورەکانى ناوخۆى کوردستان و عێراق و ناوچەکەش و دونیاش وادەخوازێت کە یەکێتى خۆى کۆبکاتەوە و بە سیاسەت و تێڕوانین و تێگەیشتنى نوێوە ،ئامادەسازى بکات بۆ هەموو پێشهات و گۆڕانکاریەکان  ءئەمەش تەنها لە کۆنگرەدا دێتە دى.بەم شێوەیە بەستنى کۆنگرەى چوارەم بۆتە زەرورەتى قۆناغەکە و ناکرێت چیدى بەبیانوى بێ ئەرزشەوە دوابخرێت،چونکە هەموو دواخستنێک تەنها بە زیانى گەورەترى یەک و یەکگرتوویى ڕیزەکانى یەکێتى تەواو دەبێت و دوژمنان و ناحەزانى کوردایەتیش سوودى لێدەبینن،چونکە یەکێتیەکى بێهێز و لاواز لە قازانجى ئەواندایە.لێرەدا ئەو پرسیارە  دێتە پێشەوە کە یەکێتیەکان چۆن کۆنگرەیەکیان گەرەکە؟ ئەى خەڵکانى دەرەوەى یەکێتی چۆن کۆنگرە و ئەنجامێک لە یەکێتى دەخوازن و چاوەڕوانى چى دەکەن ؟سەرەتا لەناوخۆى یەکێتیدا بەستنى کۆنگرە بۆتە ئەرک و زەرورەتێکى ئەم قۆناغە  و هەموان گەرەکیانە کە ئەم کۆنگرەیە ببێتە هۆکارى :-1. وەک ئەرکێکى حیزبى و بنەمایەکى سەرەکى ئاڵوگۆڕکردنى ئاشتیانەى دەسەڵات و گۆڕانکارى بە پلان،هەروەها بۆ یەکلاکردنەوەى کێشە و گرفتەکان و چارەسەرکردنیان و ڕێگەگرتنیشە لە دووکەرتبوون و جیابونەوە و باڵباڵێنى ناڕەوا و کۆتاهێنانیشە بە دەستەگەرى و بەرژەوەندخوازى و خۆ دەوڵەمەندکردن و پەرتوبڵاوى لەناو ڕیزەکاندا و کۆکبون و کۆبونەوەى هەموانە لەسەر یەک گوتار و یەک کردار.2. کۆنگرەیەک پێویستە بۆ یەکێتى دواى مام جەلال کە بتوانێت لە ئاستى خواست و ویست و دڵخوازى زۆرینە یان هەمواندا بێت لە نوێکردنەوەى بەرنامە و پەیڕەو و تێڕوانین و ئایدیاو ڕێبازى یەکێتى.3. کۆنگرەیەک پێویستە کە بتوانێت ئیشوکارەکان بخاتەوە سەر سکەى ئاسایى گەشەکردنى یەکێتى و یەکێتى بگێڕێتەوە بۆ سەردەمى زێڕین و بەهێزى و پتەوى جارانى.4. کۆنگرەیەک پێویستە کە ناوەندێکى بڕیار و مەرکەزیەتى حیزبى ببوژێنێتەوە لەناوخۆى حیزبدا.5. کۆنگرەیەک پێویستە کە بتوانێت سوود لە هەموو تواناکانى ناو یەکێتى وەربگرێت و یەکێتى نوێبکاتەوە و ڕابەرایەتى بێ جیاوازى هەموانیش بکات بەرەو سەرکەوتن.6. کۆنگرەیەک پێویستە کە بتوانێت زۆرینە ڕازیبکات بە ڕێزگرتن لە بنەماکانى دیموکراسى و ئازادى و ئاشتى و ئاڵوگۆڕکردنى دەسەڵات بە ئاشتیانە دوور لە پەنابردن بۆ بەکارهێنانى هێز و پاراستنى بەرژەوەندیەکان.7. کۆنگرەیەک پێویستە کە هەموان بڕوامان بە گۆڕانکارى یان لانى کەم ڕیفۆرمى سیاسى و ئابورى و کۆمەڵایەتى و مەعریفى هەبێت،  بە شێوەیەک  کە هەقە هەڤاڵانى دێرین و خاوەن مێژووى پرشنگدار بەسنگفراوانیەوە جێگە و پێگەى خۆیان چۆڵبکەن بۆ هەڤاڵانى تازەپێگەیشتوو و لاوانى بەتوانا لە جەستە و فکر و  خوێن گەرمیاندا.8. دەبێت هەموان بڕوا بە پێشکەوتن و گۆڕانکاریە گەورەکانى ناوخۆو ناوچەکە و دونیا بهێنین  و ئەو ڕاستیەش بسەلمێنین کە یەکێتى بەم دۆخ و سەرکردایەتى و ڕچە و ڕێباز و فۆرمى کارکردنەوە ناتوانێت ڕووبەڕووى ئاڵنگاریەکان ببێتەوە و سەرکەوتوش بێت.9. بۆیە خۆئامادەکردن و ئامادەسازى بۆ هەموو ئەو گۆڕانکاریانە پێویستى بەبەستنى کۆنگرەیەکى بەپلان و بەرنامە هەیە کە نەبێتە هۆکارى زیاتر دوورخستنەوە ولێکدابڕان و تەنانەت جیابونەوەش بەڵکو دەبێت هەموان پەرۆشى یەکڕیزى و یەک و یەکگرتوویى و پاراستنى یەکێتى ناو یەکێتى بین و هەموو دەسکەوت و خواست و بەرژەوەندیەى کەسى و  بنەماڵەیى و دەستەگەریەکان بخەینە خزمەت بەرزڕاگرتنى یەکێتى ، چونکە هەموانمان بە یەکێتیەوە جوان و ڕێزلێگیراو  وحساب بۆکراوین،بەبێ یەکێتى زەمەن دەریخست هەموانمان زۆرر بچوک و بێ بەها بوین ،چونکە یەکێتى لاوازبوو لە ڕووى سیاسى و سەرکردە و لەلایەنى ئابورى و جەماوەرى و هێز و تواناى  شەقامەوە.• بەم شێوەیە بەستنى کۆنگرە و چۆنێتى و میکانیزم و بەرنامە ڕێژکردنى کۆنگرەکە بۆئەوەى لانى کەم ببێتە جێگەى ڕەزامەندى زۆرینە،و بتوانێت وەڵامدەرەوەیەکى ڕاستگۆیانەش بێت بۆ خواست و ویستى یەکێتیەکان و لەلایەکى تریشەوە وەڵامدەرەوەیکى واقعیانەش بێت بۆ گۆڕانکاریەکانى دەوروبەر و ئایندەش، بۆتە زەرورەت و پێویستیەکى هەنوکەیى بۆ ئاساییکردنەوەى نێوماڵى یەکێتى و خۆڕێکخستنەوە و زیاتر چەسپاندنى بنەماو دروشمەکان و بە ئۆرگانیزەکردنى سەرجەم ئۆرگان و ناوەندى بڕیارەکان و ژیاننەوە و زیندووکردنەوەى سەرەتاکانى گیانى هەڤاڵانە و ڕۆحیەتى حیزبایەتى ڕاستەقینەش.• ئاشکرایە یەکێتى هەمیشە حیزبێکى سیاسى  خاوەن بیرۆکەى نوێگەرایى و نوێبونەوە و دەستپێشخەرى و داهێنان بوە،بەداخەوە دواى نەخۆشکەوتنى مام جەلال و کۆچى دواییشى  یەکێتى سەنگ و قورسایى و درەوشاوەى خۆى لەدەستدا و لەماوەى ئەم چەند ساڵەى ڕابووردووشدا ئەم سەرکردایەتیەى ئێستا نەیانتوانى بەهەموانیان جێگە و پێگەى مام پڕبکەنەوە و یەکێتى بەدووربگرن لە دەستەگەرایى و بەرژەوەندخوازى،هەربۆیە یەکێتى هیچ کات بەهێندەى ئەم چەند ساڵەى دوایى بێهێز و لاواز و پاشکەوتە دەرنەکەوتبوو، هەمیشە نهێنى سەرکەوتنى یەکێتى لە بەهێزى و پتەوى و خۆڕاگرى و پشوودرێژى و پاراستنى بنەماکانى دیموکراتى و ئازادیەکاندا خۆى دەبینیەوەو توانیویشێتى لەدواى هەموو نوچدان و شکست و کەوتنێک بە بەهێزى و گەورەییەوە هەڵبسێتەوە.بەم شێوەیە کۆنگرەى چوارەمى یەکێتى زۆر گرنگە لەڕووى زەمان و زەمینەوە چونکە لەدواى شکستى سیاسى و ئابورى و سەربازى و حیزبى و حوکمڕانیى هەرێمەکەمانەوە دێت دواى ئەوەى دەرکەوت کە 26 ساڵى حومڕانیەکى لەرزۆک و فشەڵمان بەڕێوەبردوە،بۆیە ئەم کۆنگرەیەیى یەکێتى دەبێت ببێتە کۆنگرەى هەستانەوە و گەشەکردن و نوێبونەوەى یەکێتى و حومڕانى کوردیش لەم هەرێمەدا.• لەدەرەوەى یەکێتیش هەموان گەرەکیانە کە ئەم کۆنگرەیە ببێتە کۆنگرەى بەهێزبونەوە و گەشەکردن و نوێبونەوەى یەکێتى ،چونکە بەبێ یەکێتى ژیانى حیزبایەتى و سیاسى و ئابورى و سەربازى هەموان تێکدەچن و ناهاوسەنگ دەبن و مەترسیەکان بۆسەر هەموانیان ترسناکتر و زیاتر و گەورەتر دەبێت، ئەوە تەنها هێز و بازوى یەکێتیە کەهەموانى پاراستوە و شانۆ و گۆڕەپانێکى سیاسى ساغڵەمى چێکردوە بۆ کارى هەموان ،سەرەڕاى هەموو ڕەخنە و کەموکوڕیەکانى کە لەیەکێتیان هەیە.• لەکۆتایدا یەکێتى هیچ ڕێگەیەکى ترى لەبەردەمدا نیە جگە لەبەستنى کۆنگرە و سەرخستنیشى و هەموانیش پابەندبونى خۆیان ڕابگەیەنن بە ئەنجام و گۆڕانکاریەکانیش، چونکە گەر کۆنگرە نەبەسرێت ئەوا هێواش هێواش ئەو یەکێتیەى کە ماویشمانە لەدەستمان دەچێت چونکە پیلانە دوژمنکارانەکانى دژى یەکێتى لەناوخۆ و ناوچەکەشدا هەموانیان بۆ بچوکبونەوە و نەمان و بێهێزکردنى یەکێتیە چونکە باش دەزانن تەنها یەکێتیە بەڕاست و ڕاستگۆیى لەخزمەتى نەتەوە و نیشتمان و ئایندەى کورد و کوردستاندایە و ملکەچى و نیشتیمانفرۆشى نەکردۆتە پیشە ورچە و ڕێباز وهەر یەکێتیشە کە دەتوانێت ئەم قۆناغە سەخت و دژوارەش تێبپەڕێنێت لەکاتێکدا حیزب و سەرکردەکانى تر ئەو توانایەیان نیە یان توشى شۆک و شکست و دابڕانى ناوخۆیى و ناوچەیى و دونیایش بونەتەوە، بۆیە یەکێتى دەبێت ئەو هەل و بۆشاییە پڕبکاتەوە و شکست و نسکۆکان بگۆڕێتەوە بە سەرکەوتن و گەشەکردن ئەویش بە خۆنوێکردنەوە و خوێندنەوە و هەڵسەنگاندنێکى بابەتیانە و زانستیانە و واقعیانە  دەبێت بۆ سەرجەم گۆڕانکاریەکان لە هاوکێشە و بەڵانسى هێزەکاندا لە ناوخۆى کوردستان و عێراق و ناوچەکە و بەسەرداچونەوەیەکى ژیرانەش بۆ پەیوەندیە نێودەوڵەتیەکان و دیاریکردنى نەخشەڕێگایەکى ڕوون و ئاشکراش بۆ ئامانجە نیشتیمانى و نەتەوەییەکان بۆ ئایندە.

پـــەیـــوەنــدیــدار