بـــەپــەلــە
شەهیدی یەکێتى

شەهیدی یەکێتى

یەکێتى نیشتمانى کوردستان دواى 3مانگ لەو رێکەوتنە شوومە دروستبوو کەبووە هۆی هەرەس و ئاشبەتاڵی شۆڕشی ئەیلول، ناوی (یەکێتى نیشتمانى کوردستان) ئامانجەکانى دروست بوونی، رێبازەکەى، کەرەستەکانى دەستى شۆرش، جۆرو قەبارەى شەرەکانى، جۆری دروستبوون و ساتەکانى دروستبوونى، جیاوازە لەهەر حزبێکى تری کوردستانیی، تاکە حزبی هەر چواربەشی کوردستانە ژمارەى شەهیدەکانى بگاتە 20هەزار شەهید، تەنیا حزبی ناوچەکەیە پێش ئەوەى مەرەکەبی ئیمزاى کەوتنى شۆرشی پێشی خۆی وشک بێتەوە شۆرشی هەڵگیرساندبێتەوە، یەکێتى تەنیا لەیەک مەسەلەدا لەحزبەکانى تر کەمترە، ئەویش ئەوەیە کەمترین شەهیدی لەشەری ناوخۆدا هەیە! لەرۆژی شەهیدی یەکێتیدا دواى یادکردنەوەی تەواوی شەهیدە قارەمانەکان و نەوی کردنى سەرمان لەئاست کێلی گۆڕەکانیان بەپێویستى دەزانم سەرنجێک لەبارەى(بۆچی یەکێتى زۆرترین شەهیدی هەیە) بخەمەروو:

 

ناوی یەکێتى
لەکوردستانى باشور تاکە حزبێک کە پاشگری عێراق بەناوەکەیەوە نەبێت یەکێتى نیشتمانى کوردستانە، تێکرای حزبە سیاسییەکانى تری کوردستان لەکۆتایی ناوەکانیان عێراق هاتووە، وەک: پارتى دیموکراتى کوردستان/عێراق، بزوتنەوەى ئیسلامی لەکوردستان/عێراق، کۆمەڵی ئیسلامی لەکوردستان/عێراق، حزبی زەحمەتێکێشان لەکوردستان/عێراق، حزبی شیوعی لەکوردستانى عێراق، حزبی سۆسیالیست دیموکراتى کوردستان،عێراق…..هتد، بەڵام یەکێتى، یەکێتى نیشتمانى کوردستانە، نەبوونى پاشگری عێراق بەناوی یەکێتییەوە ئەرکی یەکێتى سەخت کردووە، لەبەرئەوەى یەکێتى حزبی نیشتمانى کوردستانە، کەواتە وەک لەمێژووەکەشیدا دیارە زۆرجار چەندین مەفرەزەو لەشکری گەورەى بۆ پارچەکانى تری کوردستان ناردووە و شەری حکومەتى ئەو وڵاتانەى کردووە و بەرگری لەکورد کردووە، ناردنى هێزی پشتیوانى بۆ قوڵایی خاکی رۆژهەڵات و پەلاماردانى سوپاى پاسداران و ناردنى هێزی پێشمەرگە بۆ کۆبانى رۆژئاوا دوو نمونەى زەق و بەردەستى مێژووی یەکێتین، لەبەر ئەوەیە یەکێتى زۆرترین شەهیدی هەیە!
رێبازی یەکێتى
یەکێتى نیشتمانى کوردستان لەسەرەتاى دامەزراندنیدا بەزارەکى و لەساڵی 1983 بەکردار ( ئاشتى، ئازادی، مافی چارەنوس)ی کرد بەدروشمى سەرەکی خۆی، خەڵکى کوردستان لەرۆژگارە سەختەکانى ئاشبەتاڵدا پێویستیان بەئاشتى و ئازادی و مافی چارەنووس هەبوو ئەو سێ دروشمە بەلای خەڵکى کوردستانە گرنگییەکەى لەگرنگى ئاو زیادتر بوو بۆ ماسی، هەربۆیە هەرچەندە ئاشبەتاڵ و هەڵوێستى سەرانى راکردووى ئاشبەتاڵ نوزەى لە هیواى خەڵک بڕیبوو، بەڵام لەبەر راستگۆیی سەرۆک تاڵەبانى و هاوڕێکانى و متمانەى خەڵک بەمامجەلال، یەکێتى بەخێرایی گەشەى کردو پۆل پۆل خەڵک دەچووە ریزەکانى یەکێتى، ئەوەش بووە هۆی ئەوەى ستراتیجی لێدان و خستنى بەعس لای یەکێتی خێراترببێت، ئەوەش پێویستى بەخوێن و قوربانیدانى گەورە هەبوو، هەربۆیە یەکێتى خاوەنى زۆرترین شەهیدە!

جۆری شەرەکان!
جیاوازییەکی گەورە هەبوو لەنێوان هەردوو شۆڕشی کۆن و نوێ، شۆرشی کۆن(ئەیلول) هەرچەندە خاوەنى سەدان هەزار پێشمەرگە و جبەخانەى گەورەو و چەردەیەکی باش لەپارە بوو، بەڵام لەگەڵ ئەوەشدا قەبارەى شەڕەکان و دەستکەوت و زیانەکان زۆر بچوک و باسنەکراو بوون، بەڵام شۆرشی نوێ سەرەراى کەمی ژمارەى پێشمەرگەو نەبوونى جبەخانە و چەک و تەقەمەنى و نەبوونى پارە، بەڵام قەبارەى شەرەکان گەورەبوون و دەستکەوت و زیانەکان گەورەتربوون، ئەوەش پەیوەندی بەئامانجی رەواو رێبازی روون و پۆڵاینى پێشمەرگەی یەکێتییەوە هەبوو، ئەمەش هۆکارێکى تری زۆری ژمارەى شەهیدانى یەکێتین

ساتەکانى دروست بوونى یەکێتى
جیاوازییەکى تری شۆرشەکەى یەکێتى ئەوەبوو، لەساتەوەختێکدا دامەزرا شۆرشی پێشوو ئیرادەى خەڵکى کوردستانى وردو خاش کردبوو، ئیرادەى خەڵکی تەسلیم بەئیرادەى دوو دەوڵەتى )عێراق- ئێران) کردبوو، کە جەزائیریش نیوەندگیرو فاکتەرێکى تربوو، بەڵام یەکێتى لەو چرکە ساتانەدا ئەم هاوکێشەیەى پێچەوانە کردەوە و دژایەتى خواستى هەردوو دەوڵەت و ناوبژیوانەکەشی کردو ئیرادەى خەڵکى کوردستانى بۆ کوردستانیان گەراندەوە، ئەمەش وای کرد یەکێتى بۆماوەیەک بکەوێتە بەردەم بەرداش و هەرەشەى هەردوو دەوڵەت، ئەوەش پێویستى بەخوێن و قوربانیدان هەبوون هەربۆیە یەکێتى هەزران شەهیدی لەپێناو ئەم مەبەستەشدا بەخشی، ئەمەیە هۆکارێکى تری زۆری ژمارەى شەهیدی یەکێتى، ئینجا:
هۆکارو فاکتەری دیکە هەن کەهۆکارن بۆ زۆری مارەى شەهیدەکانمان بەڵام بەهۆکاری هەڵنەدانەوەى قەتماغەکانى شەری ناوخۆ و پیلانى ناحەزانى ناوخۆ و دەرەوە نامەوێت بچمە وردەکارییەوە، ئەوەى ماوەبۆ وتن ئەوەیە یەکێتیەکان و خەڵکى کوردستان لەسایەى خوێنى شەهیدان بە بەشێکى زۆر لەماف و ئازادییەکان گەیشتن و پێویستە بەیەکێتى ناو یەکێتى و یەکێتى نێوان لایەنەکان هەر هیچ نەبێت شەهیدەکان ئاسودەتر بکەین.

 

پـــەیـــوەنــدیــدار