سكرتاریەتی مام جەلال:مامۆستا كەریم كابان لەپێناو كوردایەتیدا دژواریی زۆری بینی

سكرتاریەتی مام جەلال:مامۆستا كەریم كابان لەپێناو كوردایەتیدا دژواریی زۆری بینی

سكرتاریەتی هەڤاڵ مام جەلال بۆ كۆچی دوایی هونەرمەندی گەورەی كوردستان مامۆستا كەریم كابان، پرسە نامەیەكی ئاڕاستەی كاك شوان كەریم كابانی كوڕی و خانەوادەو بنەماڵەكەیان كردوە، ئەمە دەقەكەیەتی:

بە ناوی یەزدانی مەزن و میهرەبانەوە

بەڕێز كاك شوان كەریم كابان

بەداخەوەین بۆ ماڵئاوایی یەكجارەكی مامۆستا كەریم كابان ، بۆ ئەو خەمەتان ، پرسە و ماتەمینی سەرۆك مام جەلال-تان پێ رادەگەیەنیین ، و لە ناخەوە بەشدارییی خەمتان دەكەین، لەڕێی ئێوەشەوە پرسەو سەرەخۆشیی ئاڕاستەی خوشكان و برایان و یەك بەیەكی بنەماڵەی تێكۆشەرتان دەكەین ، بۆ خۆتان خۆش بن و تەمەنی درێژی بۆ جێ هێشتبن.

مامۆستا كەریم كابان سەرباری لایەنە نیشتمانیی و كوردایەتییەكەی كە لەو پێناوەدا سەختی و دژواریی زۆری بینیوە هەر لە مەنفا بون تادورخستنەوە لە وەزیفە، بەدەنگ و ئاوازەكانیشی لە ماوەیی نیو سەدە زیاتر خزمەتێكی گەورەی هونەری رەسەنی گۆرانی مۆزیكی كوردیی كردەوە كە جێگەی پێزانین و خۆشەویستیی هەمو بەشەكانی كوردستانەو پێگەیەكی مەزنی لەدڵی خەڵكدا جێ كردۆتەوەو ناوبانگێكی سنوربڕی پەیدا كردوە، ئەوەش سەروەرییەكە كە هەموان شانازیی پێوە دەكەن بەو ناوبانگ و بەخششە هونەرییانە، ناوی ئەم كەسایەتییە هەمیشە لەدەرونی گەلەكەی و شارەكەی و مێژودا بەزیندویی دەمێنێتەوە .

لە یەزدانی مەزن داواكارین گیانی مامۆستا كەریم كابان بە بەهەشتی نەمریی شاد بكات، سەبوریی و دڵنەواییش بەئێوەو بنەماڵەی كابان و هونەرمەندان و دۆستان و خزمان و هەمولایەك ببەخشێت و ئەوە دوایین خەم بێت .

انا لله وانا الیە راجعون

سكرتاریەتی هەڤاڵ سكرتێری گشتیی

(ی.ن.ك)

پـــەیـــوەنــدیــدار

کـــۆمــێـنـت بــنــوســە