بـــەپــەلــە
هەڤاڵ سەعدی ئەحمەد پیرە پێشوازی لە هەڵسورێنەری کاروباری باڵوێزخانەی ژاپۆن لە سوریا کرد

هەڤاڵ سەعدی ئەحمەد پیرە پێشوازی لە هەڵسورێنەری کاروباری باڵوێزخانەی ژاپۆن لە سوریا کرد

پێشنیوەرەرۆی ئەمڕۆ چوارشەممە ١٧-٢-٢٠١٦ هەڤاڵ سەعدی ئەحمەد پیرە ئەندامی مەکتەبی سیاسی و لێپرسراوی مەکتەبی پەیوەندییەگشتییەکانی یەکێتی نیشتیمانی کوردستان لە بارەگای مەکتەبی سیاسی لە شاری هەولێر پێشوازی کرد لە ( فوتوشی ماتسوموتو) هەڵسورێنەری کاروباری باڵوێزخانەی ژاپۆن لە سوریا کە ئێستا بە سەردانێکی دیبلۆماسی لە هەرێمی کوردستانە

 

لە دیدارێکی نێوان هەر دوولادا باس لە دواین گورانکاری و رووداو و پێشهاتە سیاسی و ئابورییەکانی رۆژهەڵاتی ناوەڕاست بەگشتی و ململانێی سیاسی و سەربازی سوریا بەتایبەتی کرا

هەڤاڵ سەعدی ئەحمەد پیرە تەئکیدی کردەوە کە کێشەکان لەبەرئەوەی لە بنەرەتدا کێشەی سیاسین بۆیە پێویستە هەر بە شێوەیەکی سیاسیانە و لەسەر مێزی گفتوگۆ چارەسەربکرێن هەموو لایەک بە تێگەیشتن لە هەستیاری رووداوەکان و لەبەرچاوگرتنی پێکهاتەی رۆژهەڵاتی ناوەڕاست بە گیانی لێپرسراوێتیەوە مامەڵە لەگەڵ دۆخەکە بکەن هاوکات ئاماژەی بە رۆڵ و پێگەی ژاپۆن کرد لە هاوکێشە جیهانی و هەرێمایەتییەکاندا بۆیە بە پێویستی زانی لەم بارودۆخەشدا حکومەتی تۆکێۆ رۆڵی خۆی بگێرێ ، ببێتە هۆکار و هاندەر بۆ ئاساییکردنەوەی بارودۆخەکە و چارەسەری ئاشتیانەی دوور لە توند و تیژی و شەڕ

تەوەرێکی تری دیدارەکەی نێوان هەڤاڵ سەعدی ئەحمەد پیرە و فوتوشی ماتسوموتو هەڵسورێنەری کاروباری باڵوێزخانەی ژاپۆن لە سوریا بریتی بوو لە هەڵسەنگاندی بارودۆخی سیاسی و ئابوری هەرێمی کوردستان و چۆنیەتی دۆزینەوەی رێگا چارەی گونجاو بۆ دەرباز بوون لە قەیرانە سیاسی و ئابوری و داراییەکان کە ئێستا بۆتە هۆی دڵەراوکێ و نیگەرانی کۆمەڵانی خەڵک ، هەڤاڵ سەعدی ئەحمەد پیرە ئاماژەی بەوەکرد کە باشترین دەستپێک بۆ چارەسەر بریتیە لە چارەسەری بەپەلەی کێشە دارایی و ئابورییەکان و باشترکردنی گوزەرانی هاوڵاتیان پاشان بیرکردنەوەی لە چارەسەرکردنی کێشە سیاسی و یاساییەکانی ناوخۆی هەرێمی کوردستان کە هاندەردەبێت بۆ بەرقەرار بوونی ئاسایش و ئارامی لە ناوچەکەدا .

فوتوشی ماتسوموتو هەڵسورێنەری کاروباری باڵوێزخانەی ژاپۆن لە سوریا سوپاسگوزاری و خۆشحاڵی خۆی بەدیدارەکە دەربڕی و رایگەیاند بۆ زیاتر توندوتۆڵکردنی پەیوەندییەکان و هەماهەنگی لەگەڵ حکومەتی هەرێمی کوردستان ، حکومەتی تۆکیۆ لە ئامادەکاریدایە بۆ کردنەوەی نوسینگەی نوێنەرایەتی ژاپۆن لە هەرێمی کوردستان کە چاوەڕوان دەکرێت لەسەرەتای ساڵی داهاتوو بەڕەسمیی لە هەولێر بکرێتەوە .

 

فۆتۆ: دەرباز ستار ئەمین

پـــەیـــوەنــدیــدار

کـــۆمــێـنـت بــنــوســە