مەلا بەختیار: هەشتی مارس، هەزار جار لەژنی وەك پورە مینا پیرۆز بێت

مەلا بەختیار: هەشتی مارس، هەزار جار لەژنی وەك پورە مینا پیرۆز بێت

پورەی مینای حاجەی مامەند بەسەردەكاتەوەو وەفاداری دڵسۆزییەكەیەتی

“بۆ یەكەمینجار راستییەكی مێژوییی سەبارەت بەكەمال پشدەری ئاشكرا دەكات”

 

مەلا بەختیار، لەڕۆژی ژنانی جیهاندا، پورە مینای حاجی مامەند لەبیرناكات‌و بەدەست ماچكردنی ئەو خانمە دڵسۆزو ماندووەی رۆژانی سەختی خەباتی پێشمەرگایەتی، پیرۆزبایی هەشتی مارسی لێدەكات‌و وەفادارو پێزانینی خۆیشی، بەرامبەر هەموو ئەو خزمەت‌و شەونخونییانە دەنوێنێ‌، كە پێشكەشی پێشمەرگەی كردووە.
ئێوارەی (8/3/2016) لەشاری سلێمانی، هەڤاڵ مەلا بەختیار، لێپرسراوی دەستەی كارگێڕی، سەردانی پورە مینای حاجی مامەندی كردو دەستەكانی ئەو خانمە دڵسۆزەی ماچ كردو پێیوت: رۆژی هەشتی مارست لێ پیرۆز بێ‌‌و رایگەیاند: مێژووی تۆ، خزمەتەكانی تۆ، ماڵەكەی تۆ، ئاگردانەكەت، پەرۆشی‌و دڵسۆزییەكەت، بەجێگەی شانازی خۆم دەزانم‌و سەردانیشم لەمرۆژەدا، پێزانینمە بەرامبەر هەموو ئەو خزمەتانەی پێشكەشت كردووین. بۆیە دەڵێم، رۆژی هەشتی مارس، هەزار جار لەژنی وەك پورە مینا پیرۆز بێت.
وتیشی: پورە مینا، دایكی سەنگەر بوو، دایكی خەبات بوو، دایكی پێشمەرگە بوو، دایكی كوردستانیشیت‌و هێشتاش ئەگەر هەر ناوێكی تری جێگەی شانازیت لێ بنێم، كەممە.
هەڤاڵ مەلا بەختیار، لاپەڕەی بیرەوەرییەكانی رۆژانی پێشمەرگایەتی لەحاجی مامەند هەڵدایەوە‌و تیایدا دامەزراندنی مەڵبەندی رێكخستنی سلێمانی گێڕایەوەو هەر لەو رۆژگارەدا ئاماژەی بەو پیلانەش كرد، كە لەلایەن ئەمنی عامەی بەعسەوە، بۆ تیرۆركردنی داڕێژرابوو، دوابەدوای گێڕانەوەی چیرۆكی چۆنێتی رزگار بوونی لەپیلانەكە، بۆ یەكەمجارو بۆ مێژوو رایگەیاند، كە:
بۆ مێژوو دەڵێم، كەمال پشدەری كە كوژرا، غەدرێكی گەورەی لێكرا، چونكە كەمال، پێشتر پەیوەندی بەشەهید ئارام‌و دواتریش پەیوەندی بەجەنابی مام جەلال‌و بە منەوە هەبوو. ئەم پیاوە رەنگە سەد هەواڵی بۆ ناردبین، سەد نهێنی بۆ دركاندبین، سەد منداڵ‌و ژنە پێشمەرگەی رزگار كردبێ‌.
راشیگەیاند: بێگومان لەسەدا سەد من تیرۆر دەكرام، ئەگەر كەمال پشدەری نەبوایە. چونكە كاتێك بەپیلانەكەی ئەمنی عامە دەزانێت، بەپەلە هەواڵ بۆ مام جەلال دەنێرێت‌و نهێنییەكانی پیلانەكەی بۆ ئاشكرا دەكات. وتیشی: سەرەڕای ئەوەش، بەرەحمە خان‌و شێخ جەنابیشدا، هەواڵی بۆ خۆم نارد، كە فریای خۆم بكەم‌و وتیشی: باشترین زانیارییەكانی ئەمنی سلێمانی لەلایەن كەمال پشدەرییەوە دەگەیشتە لای ئێمە.
گێڕاشییەوە، كە رۆژێك دوای ئەوەی كەمال پشدەری نهێنییەكانی پێدام، بەكرێگیراوەكە هاتە لام‌و دەستگیر كرا‌و ئاماژەی بۆ ئەوەشكرد، ئەگەرچی حاكمی شۆڕش بڕیاری لەسێدارەدانی بۆ دەكرد، بەڵام من لەبەر خاتری باوكە نابیناكەیی‌و چوار منداڵ‌و ژنەكەی لێیخۆش بووم‌و ئازادم كرد‌و ئێستاش لەژیاندا ماوە.
پورە میناش لای خۆیەوە، دوایئەوەی هەڤاڵ مەلا بەختیاری بەتوندی لەئامێز گرت‌و پێوت (رۆڵە سوپاس بۆ خوا كە جارێكی تر دەتبینمەوە)، ئاماژەی بۆ ئەوەكرد، كە بەم سەردانەت سەرم هێندەی ئاسمان بەرزەو وتی: من هیچم نەكردووە، چونكە ئەوەندەی كردوومە بۆ خۆمم كردووە‌و داوای لێبوردنیشی كرد، كە نەیتوانیووە لەشەڕی داعشدا، سەردانی هەڤاڵ مەلا بەختیارو هێزی پێشمەرگە لەسەنگەرەكانی پێشەوە بكات‌و هەروەك جاران خزمەتیان بكات.
پورە مینا، ئاماژەی بۆ ئەوەشكرد، كە ئەو هیچ كاتێك خۆی بەخاوەن ماڵ نەزانیوە لەئاستی پێشمەرگەداو ئێستاش هەمان هەستی هەیە.

s:pukpb

پـــەیـــوەنــدیــدار