دەقی وتاری ئەنجومەنی ناوەندی.. ساڵیادی کۆچی دوایی هەڤاڵ (ئاوات عەبدولغەفور) بەرز راگیرا

دەقی وتاری ئەنجومەنی ناوەندی.. ساڵیادی کۆچی دوایی هەڤاڵ (ئاوات عەبدولغەفور) بەرز راگیرا

 

ئەمڕۆ 12ی ئازاری  2016 لە مەراسیمێکی شایستەدا ساڵیادی کۆچی دوایی  تێکۆشەر و پێشمەرگەی دێرین هەڤاڵ (ئاوات عەبدولغەفور) ئەندامی هەردوو خولی ئەنجومەنی ناوەندی یەکێتیی نیشتمانیی کوردستان بەرز راگیرا .

لە مەراسیمێکی شایستەداو بە ئامادەبوونی ئەندامانی مەکتەبی سیاسی و سەرکردایەتی ی.ن.ک و زۆرینەی ئەندامانی ئەنجومەنی ناوەندی و هاوڕێ و هاوسەنگەرانی ئاوات عەبدولغەفور لە هۆڵی تەوار لە شاری سلێمانی ساڵیادی کۆچی دوایی بەڕێوەچوو.

 

سەرەتای مەراسیمەکە بە دەقیقیەک وەستان بۆ گیانی پاکی شەهیدان دەستیپێکرد، پاشان مەلا سامان وتارخوێنی شەهیدان چەند ئایەتێک لە قورئانی پیرۆزی خوێندەوە .

ووتاری مەکتەبی سیاسی لەلایەن مستەفا چاورەشەوە خوێندرایەوە .

پاشان فیلمێکی دیکۆمێنتاری لەسەر ژیان و خەباتی هەڤاڵ ئاوات عەبدولغەفور نمایش کرا .

 

لەو مەراسیمەدا وتاری ئەنجومەنی ناوەندی (ى.ن.ک) لەلایەن زوبێر عوسمان جێگری یەکەمی سکرتێری ئەنجومەنی ناوەندییەوە پێشکەشکرا کەئەمەی خوارەوە دەقەکەیەتی:

 

خوشکی بەڕێزمان پرشنگ خان هاوسەری ، هاوڕێ و هاوسەنگەرمان کاک ( ئاوات عەبدولغەفور )ی نەمر.

 

کچ وکوڕو کەسوکاری خانەوادەی کاک (ئاوات عەبدولغەفور)ى تێکۆشەر و قارەمان و لەیاد نەچوومان .

 

کەسوکاری سەربەرزی شەهیدان

 

ئا مادەبوانی بەڕێز

 

ئەمرۆ ساڵیک تێپەڕ دەبێت بەسەر ماڵئاوایی کردنی سەرکردە و فەرماندە و کادیرو پێشمەرگەی چاو نەترس و ئازاو قارەمان ء ماندوو نەناسی یەکێتی نیشتمانی کوردستان کەلە ماوەی (68) ساڵ تەمەنیدا زیاتر لە نیو سەدە خۆی خۆی تەرخان کردبوو بۆ جۆشدانی کۆڕی خەباتی کوردایەتی ، کەلە تەمەنی (14) ساڵی و لە ساڵی (1961) چوەتە ڕیزی خەباتی پیشەیی و سیاسی و هەر هەمان ساڵ پەیوەندی دەکات بە ڕیزەکانی هێزی پێشمەرگەی کوردستان و چەکی شەرەف و بەرگری دەکاتە شان و دەبێتە شۆڕشگێڕێکی سیاسی چەکدار خەبات دەکات لە پێناو ڕێبازی شۆڕشگێرانەی سەرکەوتنی ستراتیجی نەتەوەیی و نیشتمانی و یەکێک دەبێت لەو تێکۆشەرانەی بێجگە لە قوربانیدان و شەو نخونی لە لە پێناو مافی رەوای گەلەکەی لە باشوری کوردستان، ئەژمار دەکرێ بە ئەندامی فەخری خەباتی ڕزگاری خوازی میللەتەکەمان لە پارچەکانیتری کوردستان .

کاک ئاوات کادیرێکی ژیرو بە وەفاو لێهاتوو قاڵبوی یەکێتی نیشتمانی کوردستان بوو ، یەکێک بوو لە سەرکردەو دامەزرێنەرانی کۆمەڵەی مارکسی لیننی کوردستان و لە پێشەنگ و کەسایتیە دیار و کاریگەرەکانی خەباتی بیرو هزر و ئایدلۆژیای نوێی گەلەکەمان بوو .

کاک ئاواتى نەمر سیاسیەکی سەر راست و  فیداکار و نەبەز لە ڕیزی خەباتی کوردایەتی ، وە کوردێکی بێ غەل و غەش بوو ،زیندانەکانی دڕندەترین دبکتاتۆری جیهان گەواهیدەری نەبەزین و وورەو ئیرادەی پۆڵاین و کارامەیی ئەو سەرکردە خۆراگرەن کە بۆ ئەبەد ناوی بە پرشنگداری لە لاپەرەکانی مێژووی گەلەکەماندا بە درەوشاوەیی دەمێنێتەوە، کاک ( ئاوات )ى هاوڕێ هاوسەنگەرمان ساڵێک لەمەوبەر ماڵئاوایی لێکردین بەڵام جەردەیەک لە مێژووی ئەزمونەکانی لە بواری خەباتی نهێنی و خۆڕاگری و زیندان و پێشمەرگایەتی و ڕێکخراوەی و دبلۆماسی و هزری و معریفی و ئیداری و سیاسی بۆ بەجێهێشتین کە هەر کەسێک بە ووردی ئاشنابێت بە وێستگە کانی خەباتی ئەم کەڵە پیاوە دەبێتە پسپۆڕ لە بوارە هەمە جۆرەکانی خەباتگێری و شارەزا دەبێت لە ئاسایش و ئۆقرەی و ئاشتی و ئازادی و دیموکراسی و یەکسانی و عەدالەتی کۆمەڵایەتی،کە کاکە ئاوات لە پێناويدا تێدەکۆشا.

خوشکو برایانی خۆشەویست:

وێستگە کانی خەباتی کاک ئاوات ئەوەندە زۆر و گرنگن تا قسەیان لەسەر بکرێت کۆتایی نایەت ، لێرەدا بە کورتی  ئاماژە بە هەردوو خولی یەکەم و دووەمی ئەنجومەنى ناوەندی دەکەم کە هەڤاڵ ئاوات عبدالغفور لە هەردوو خولەکەدا ئەندام بوو ،هاوڕێ و هاوسەنگەرمان بوو ، وە یەکێک لە ئەندامە بە ئەزموون و شایستە و دڵسۆز و لێهاتوەکانی ئەنجومەنەکەمان بوو کە زۆر سودی پێگەیاندین ، بەهەڵوێستە راشکاوەکانی ، بە ئەزموونە گرنگەکانی ، بە بیرۆکە و پێشنیار و سەرنج و تێبینیەکانی ، بە چاودێریکردن و تێڕوانینەکانی بۆ پرسە هەستیار و بابەتى چارە نوسسازەکان ، هەربۆیە دۆسیەیی کاک ئاواتی خۆشەویست لە ئەرشیفی ئەنجومەنى ناوەندی پارێزراوە و بەرز راگیراوە و شوێنی تایبەت و شایستەی پێدراوە بە هامان شێوەى ناوی کاک ئاوات وەکو مامۆستا و بیرمەندو جەنگاوەرێکی دێرین لە ناو دڵ و دەرون و ناخ و هەستی هەر (100) ئەندامەکەی ئەنجومەنى ناوەندیدایە.

ئامادەبوانی بەڕێز :

لە (19/4/2015) و لە چلەی کاک ئاواتی تێکۆشەر و سەرکردەدا، رامانگەیاند: کە ناکرێ یەکێتی نیشتمانی کوردستان بە بچوکی سەیر بکرێ، پیلانگێڕی و تەڵەکەبازى و سستەم کاری لە دژ بکرێت ، چونکە یەکێتی بەسەر سەدان تەنگەو چەڵەمەو قەیران و کۆسپی سەخت و دژوار سەرکەوتووە ،یەکێتی، یەکێتی دەیان هەزار شەهیدە ، یەکێتی ، یەکێتی جەماوەری خەڵکی کوردستان و سەدان هەزار  فەرماندە و ئەفسەر و کادیر و پێشمەرگە و ئەندامە ، یەکێتی ، یەکێتی سەرۆک مام جەلالە ، بۆ هەموو لایەک روون بوەوە و ئەمرۆ دەبینین کە یەکێتیەکەی کاک (ئاوات عەبدولغەفور) راگری هاوسەنگیە لە هەرێمی کوردستان و پارێزەری راستەقینەی خاک و خەڵکی کوردستانە ، بەبێ یەکێتی پایەکانی کوردایەتی لاواز و لەرزۆک دەبن.

لە کۆتایدا دووبارە سەرەخۆشی لە خۆمان و خانەوادەو کەسوکاری کاک ئاوات دەکەین و باشترین وەفاداریش بۆ کاک ئاواتی هاوڕێ و هاوسەنگەرمان دریژە پێدانە بە ڕێبازە پیرۆزەکەی ، لەدەستدانی کاک ئاوات بۆ یەکێتی و بۆ ئەنجومەنەکەمان خەسارەتێکی گەورەبوو .

هەزاران سڵاو لە گیانی پاکی پیرۆزی کاک ئاوات عەبدولغەفوری نەمر و سەرجەم شەهیدانی ڕێگای رزگاری کورد و کوردستان.

ئێوەش هەرشادو سەرکەوتو بن

ئەنجومەنی ناوەندی ى ن ک

12/3/2016

وتاری بنەماڵەی خوالێخۆشبووش لەلایەن خاتوو پرشنگی خێزانی ئاوات عەبدولغەفورەوەخوێندرایەوە .

DSC_0162 (Copy) DSC_0128 (Copy) DSC_0126 (Copy) DSC_0086 (Copy)

 

پـــەیـــوەنــدیــدار