بـــەپــەلــە
ئاسۆ مامه‌ند: كاتی ئه‌وه‌ هاتووه‌ كه‌ سه‌ركردایه‌تیی كورد رۆڵێكی باشتر بگێڕێت له‌ چاره‌سه‌ركردنی كێشه‌كانی كه‌ركوك ‌‌

ئاسۆ مامه‌ند: كاتی ئه‌وه‌ هاتووه‌ كه‌ سه‌ركردایه‌تیی كورد رۆڵێكی باشتر بگێڕێت له‌ چاره‌سه‌ركردنی كێشه‌كانی كه‌ركوك ‌‌

كه‌ركوك: عومه‌ر غه‌ریب

یادی راپه‌رین‌و رزگاری كه‌ركوك بۆنه‌یه‌كی پیرۆزه‌ بۆ خه‌ڵكی كوردستان‌و سه‌روه‌ریه‌كی مه‌زن‌و گه‌وره‌شه‌ بۆ به‌رخودانی گه‌له‌كه‌مان له‌پێناوی‌ ئازادی‌و سه‌رفرازیی بۆ ئێستاو داهاتووی گه‌لی كوردیش ته‌ماشا ده‌كرێت، له‌یاده‌وه‌ری ئه‌و رۆژه‌ مه‌زنه‌دا كه‌ركوكییه‌كان ئه‌و بۆنه‌یه‌ ده‌كه‌نه‌ ده‌رفه‌تێك بۆ پێكه‌وه‌ژیان و هه‌وڵدان بۆ به‌دیهێنانی ئامانجه‌ به‌دینه‌هاتوه‌كانی گه‌لی كوردستان.

دوای تێپه‌ربوونی 25 ساڵ به‌سه‌ر راپه‌رینی ئاداری ساڵی 1991 كه‌ راپه‌رینی جه‌ماوه‌ری خه‌ڵكی كوردستان له‌ رانیه‌ی ده‌روازه‌ی راپه‌رینه‌وه‌ ده‌ستیپێكردو له‌كه‌ركوكی قودسی كوردستانه‌وه‌ كۆتایپێهات، ئه‌و بۆنه‌یه‌ به‌ڕۆژێكی ئێجگار مێژوویی لای گه‌لی كوردستان ئه‌ژمار ده‌كرێت به‌و پێیه‌ی رزگاركردنی كه‌ركوك بۆ یه‌كه‌مین جار له‌سه‌ر ده‌ستی كورد چه‌ندین ده‌لاله‌تی سیاسی هه‌یه‌. له‌كاتێكدا ئه‌مساڵ یاده‌وه‌ری راپه‌رینی ئاداری ساڵی 1991 ده‌كه‌ینه‌وه‌ كه‌ركوك له‌ته‌ماسدایه‌ له‌گه‌ڵ تیرۆریستانی داعش‌و چاره‌ونوسی كه‌ركوك له‌ڕووی یاساییه‌وه‌ یه‌كلایی نه‌بۆته‌وه‌ ئه‌گه‌ر چی له‌ڕووی دیفاكتۆوه‌ كه‌ركوك له‌ژێر كۆنترۆڵی هێزی پێشمه‌رگه‌دایه‌و ململانێكانی نێوان هه‌رێم‌و به‌غداش له‌سه‌ر كێشه‌ی خاك له‌م ناوچه‌ كوردستانییه‌ درێژه‌ی هه‌یه‌و هه‌نگاوه‌كانی ماده‌ی 140 به‌پێی پێویست نین، هه‌روه‌ها خواستی كه‌ركوكییه‌كانیشه‌ كێشه‌كانی كه‌ركوك به‌ره‌و چاره‌سه‌ركردن ببرێن‌و ئه‌و مافانه‌ی له‌ماوه‌ی رابردوودا بۆ كه‌ركوك به‌دی نه‌هاتوون له‌سه‌روشیه‌وه‌ گه‌ڕانه‌وه‌ی كه‌ركوك بۆ سه‌ر هه‌رێمی كوردستان بگاته‌ ئامانج..

 

راپه‌ڕین قۆناغێكی‌ گرنگی‌ خه‌باتی‌ ره‌وای‌ میلله‌ته‌كه‌مان بوو

بۆ گفتوگۆكردن له‌باره‌ی دۆزی كه‌ركوك له‌دیمانه‌یه‌كی تایبه‌تدا چه‌ندین پرسیارمان روبه‌ڕوی ئاسۆ مامه‌ند ئه‌ندامی مه‌كته‌بی سیاسی‌و لێپرسراوی مه‌ڵبه‌ندی رێكخستنی كه‌ركوكی ی.ن.ك كرده‌وه‌، له‌ده‌ستپێكی دیداره‌كه‌ش رای ئه‌ومان وه‌رگرت له‌باره‌ی راپه‌رین‌و یادی 25 ساڵه‌ی رزگاركردنی كه‌ركوك له‌ڕاپه‌رینی جه‌ماوه‌ری كوردستان‌و پێی راگه‌یاندین كه‌ راپه‌رینی جه‌ماوه‌ری گه‌لی كوردستان قۆناغێكی گرنگی خه‌باتی ره‌وای گه‌له‌كه‌مانه‌ له‌پێناوی‌ به‌دیهێنانی ئاوات‌و ئامانجه‌ پیرۆزه‌كانی خه‌ڵكی كوردستان، وتیشی ئه‌گه‌ر راپه‌رین‌و رزگاری شاره‌كانی تری باشووری كوردستان جارێك گرنگی هه‌بێت، ئه‌وا رزگاری كه‌ركوك له‌و راپه‌رینه‌دا سه‌دان جار گرنگی خۆی هه‌یه‌ به‌و پێیه‌ی بۆ یه‌كه‌مین جار كه‌ركوك له‌سه‌ر ده‌ستی هێزی پێشمه‌رگه‌ی كوردستان رزگار كرا، وتیشی كاتێك له‌ڕاپه‌رینه‌كه‌دا یه‌كێتیی نیشتمانیی كوردستان پلانی رزگاری بۆ كه‌ركوك داده‌نا، زۆر لایه‌نی سیاسی هه‌بوون كه‌باوه‌ریان به‌وه‌ نه‌بوو كه‌ركوك رزگارده‌كرێت، به‌ڵام سووربونی یه‌كێتی له‌سه‌ر ئه‌و داوایه‌ وایكرد ئه‌و ئاواته‌ گرنگه‌ی خه‌ڵكی كوردستان بێته‌دی، وتیشی له‌كاتێكدا یادی راپه‌رین‌و رزگاری كه‌ركوك ده‌كه‌ینه‌وه‌، ناكرێت باس له‌ڕۆڵی سه‌رۆك مام جه‌لال نه‌كه‌ین كه‌ئه‌ندازیاری سه‌ركه‌وتنی ئه‌و راپه‌رینه‌ بووه‌ و وته‌كانی به‌ڕێزیان به‌وه‌ی كه‌ركوك كوردستانییه‌و هه‌ر به‌كوردستانیش ده‌مێنێته‌وه‌، به‌ر له‌ڕاپه‌رینه‌كه‌ش گه‌واهی ئه‌و راستیه‌یه‌ كه‌مام جه‌لال خه‌مخۆرانه‌و به‌په‌رۆشه‌وه‌ كاری بۆ سه‌ركه‌وتنی راپه‌رین‌و رزگاری كه‌ركوك كردوه‌و هه‌ر ئه‌وه‌ش بوو بووه‌ بنه‌مای سازدان‌و سه‌ركه‌وتنی راپه‌رینی گه‌لی كوردستان له‌شاری كه‌ركوك.

ئاسۆ مامه‌ند رایگه‌یاند: راپه‌رینی ئاداری ساڵی 1991 بووه‌ هه‌وێنی رزگاركردنه‌وه‌ی كه‌ركوك له‌مانگی‌ نیسانی ساڵی 2003، له‌و پڕۆسه‌یه‌شدا یه‌كێتیی نیشتمانیی كوردستان رۆڵی سه‌ره‌كی بینی له‌ڕزگاركردنه‌وه‌ی كه‌ركوك‌و له‌ئێستاشدا كه‌یادی راپه‌رین ده‌كه‌ینه‌وه‌ ی.ن.ك به‌رده‌وامه‌ له‌خه‌باتی زیاتر له‌پێناوی خزمه‌تكردنی كه‌ركوك‌و به‌دیهێنانی ئاوات‌و ئامانجه‌ سه‌ره‌كیه‌كانی كوردستانیان له‌شاری كه‌ركوك، راشیگه‌یاند: ی‌.ن.ك چی له‌ڕاپه‌رینی ساڵی 1991و دواتریش هه‌زاران شه‌هیدی له‌پێناو رزگاری كه‌ركوك به‌خشیوه‌ و به‌رده‌وامیشه‌ له‌خه‌بات‌و تێكۆشان له‌پێناوی‌ دابینكردنی دواڕۆژێكی گه‌ش‌و پرشنگدار بۆ گه‌له‌كه‌مان.

ئاسۆ مامه‌ند ئه‌وه‌شی راگه‌یاند ئه‌و ئازادیه‌ی ئه‌مڕۆ له‌كه‌ركوكدا هه‌یه‌ به‌رهه‌می راپه‌رینی ئاداری ساڵی 1991-ه‌، له‌و باره‌یه‌وه‌ ئاماژه‌ی‌ كرد بۆ ئه‌وه‌ی‌ كه‌ ئه‌ركی سه‌ركردایه‌تی كوردو هه‌موو لایه‌نه‌ سیاسییه‌كانه‌ پێداگری له‌سه‌ر مافه‌ به‌دی نه‌هاتوه‌كانی كه‌ركوك بكه‌ن‌و كار بكه‌ن بۆ گه‌ڕانه‌وه‌ی كه‌ركوك بۆ سه‌ر هه‌رێمی كوردستان.

 

یه‌كێتی خوێنی زۆری بۆ كه‌ركوك به‌خشیوه‌

له‌باره‌ی دۆخی ئێستای كه‌ركوك له‌ڕووی سیاسیه‌وه‌ ئاسۆ مامه‌ند ئاشكرای كرد كه‌ دۆخی كه‌ركوك بارودۆخێكی ئارامه‌ به‌و پێیه‌ی له‌ماوه‌ی رابردو هێزی پێشمه‌رگه‌ توانی پیلانی تیرۆریستانی داعش له‌گۆڕبنێت كه‌ده‌یانویست هه‌ڕه‌شه‌و مه‌ترسی بۆ سه‌ر كه‌ركوك دروست بكه‌ن، له‌ئێستادا هێزی پێشمه‌رگه‌ی كوردستان پارێزگاری له‌ده‌وروبه‌ری كه‌ركوك ده‌كات و به‌نیسبه‌ت ناو شاریش هێزه‌كانی ئاسایش‌و پۆلیسی ناوخۆیی ئه‌منیه‌تی ناو شاره‌كه‌یان پاراستوه‌ و هه‌ندێ كێشه‌ هه‌یه‌ كه‌ بۆ كه‌ركوك دروستده‌كرێت له‌ڕووی بێبه‌ش كردنی پارێزگاكه‌ له‌شایسته‌ داراییه‌كانی خۆی كه‌ ئه‌وه‌ش ده‌گه‌ڕێته‌وه‌ بۆ ئه‌و كێشانه‌ی له‌نێوان هه‌رێم‌و به‌غدادا هه‌یه‌و ئێمه‌ داوا له‌هه‌ردوولایان ده‌كه‌ین كه‌پێویسته‌ هاوكاری ئیداره‌ی كه‌ركوك بكه‌ن بۆ ئه‌وه‌ی زیاتر بتوانرێت خزمه‌تی كه‌ركوك بكه‌ین، سه‌باره‌ت به‌دۆخی ئه‌منی شاری‌ كه‌ركوك، ئاسۆ مامه‌ند ئه‌ندامی‌ مه‌كته‌بی سیاسی‌و لێپرسراوی‌ مه‌ڵبه‌ندی‌ رێكخستنی‌ كه‌ركوك وتی: هه‌ڵكه‌وته‌ی كه‌ركوك له‌ڕووی ئه‌منیه‌وه‌ له‌زۆربه‌ی شاره‌كانی تری كوردستان جیاوازه‌، ئه‌ویش بۆ ئه‌وه‌ ده‌گه‌ڕێته‌وه‌ كه‌ گروپه‌ تیرۆریستییه‌كان شانه‌ی تیرۆریستییان له‌هه‌ندێ ناوچه‌ی پارێزگاكه‌ هه‌بووه‌ بۆیه‌ پاراستنی كه‌ركوك له‌ڕووی ئه‌منیه‌وه‌ كارێكی ئاسان نه‌بوه‌، به‌ڵام له‌گه‌ڵ ئه‌وه‌شدا پیلانه‌كانی ئه‌و گروپه‌ تیرۆریستییانه‌ له‌كه‌ركوك پوچه‌ڵكراونه‌ته‌وه‌ كه‌ ئه‌وه‌ش بۆ چاوكراوه‌یی هێزه‌ ئه‌منییه‌كانی كه‌ركوك ده‌گه‌ڕێته‌وه‌ كه‌ لێبراوانه‌ كاریانكردوه‌ بۆ پاراستنی ئاسایش‌و ئارامیی شاری كه‌ركوك. وتیشی: بۆ به‌ده‌ستهێنانی ئه‌و ئارامییه‌ یه‌كێتی خوێنی زۆری بۆ كه‌ركوك به‌خشیوه‌ و ئه‌و خوێن به‌خشینه‌ به‌لای یه‌كێتیه‌وه‌ پیرۆزه‌، به‌ڵام ده‌كرێت بڵێین ئه‌گه‌ر ئه‌و خوێن به‌خشینه‌ی ئێمه‌ نه‌بوایه‌ كه‌ركوكیش به‌ده‌ردی موسڵ‌و دیاله‌و تكریت ده‌چوو، بۆیه‌ ده‌كرێت بڵێین مه‌ترسییه‌ ئه‌منییه‌كان له‌سه‌ر كه‌ركوك نه‌ماون‌و هیوادارین له‌ئاینده‌یه‌كی نزیكدا ناوچه‌كانی ماون به‌ته‌واوی له‌داعش كۆنترۆڵ بكرێته‌وه‌، خه‌ڵكی كوردستان‌و كه‌ركوك دڵنیا ده‌كه‌ینه‌وه‌ كه‌شاری كه‌ركوك وه‌ك چاوی خۆمان ده‌پارێزین‌و خۆمان به‌خزمه‌تكاری كه‌ركوك ده‌زانین‌و خه‌باتی كه‌ركوكییه‌كان به‌هه‌ند ده‌زانین‌و ئه‌وه‌ یه‌كێتیه‌كه‌ی خۆیان‌و مام جه‌لاله‌كه‌ی خۆیان‌و رێبازه‌كه‌ی مام جه‌لال خۆمان به‌خه‌مخۆری زیاتری كه‌ركوك ده‌زانین‌و له‌و پێناوه‌شدا ئاماده‌ی هه‌موو قوربانیه‌كین.

ئاسۆ مامه‌ند ئه‌ندامی مه‌كته‌بی سیاسی‌و لێپرسراوی مه‌ڵبه‌ندی رێكخستنی كه‌ركوكی ی.ن.ك له‌باره‌ی په‌یوه‌ندیه‌كانی یه‌كێتی له‌گه‌ڵ هێزو لایه‌نه‌ سیاسییه‌كان‌و پێكهاته‌كانی تریش رایگه‌یاند: په‌یوه‌ندییه‌كانی یه‌كێتی له‌گه‌ڵ هه‌موو لایه‌نه‌ سیاسییه‌كانی كه‌ركوك په‌یوه‌ندییه‌كی باشه‌، ئه‌گه‌ر چی ره‌نگه‌ هه‌ندێ لایه‌ن‌و هه‌ندێ كه‌س له‌به‌رژه‌وه‌ندی خۆیان بیر بكه‌نه‌وه‌، به‌ڵام ئه‌گه‌ر به‌وردی‌ سه‌رنجی‌ په‌یوه‌ندییه‌كانی كه‌ركوك بكه‌ین، ئه‌وا كوردو توركمان‌و عه‌ره‌به‌ ره‌سه‌نه‌كان‌و كلدۆ ئاشوریه‌كانیش رۆڵ‌و خه‌مخۆری یه‌كێتی بۆ دۆخی كه‌ركوك تێگه‌یشتون‌و بینیویانه‌ كه‌ یه‌كێتی خه‌مخۆری ئه‌م شاره‌یه‌و، هاوكات هه‌موو لایه‌ك سه‌روه‌رییه‌كانی یه‌كێتی‌و خه‌مخۆریه‌كانی مام جه‌لال بۆ مه‌سه‌له‌ی كه‌ركوكیان له‌یاده‌ كه‌ چۆن له‌هه‌موو سه‌رده‌مه‌كاندا خزمه‌تی كه‌ركوكی كردوه‌و په‌یوندییه‌كانمان له‌گه‌ڵ هه‌موو لایه‌ك به‌باشی ده‌بینین‌و هه‌وڵیش ده‌ده‌ین بۆ داهاتووش بره‌وی زیاتر به‌و په‌یوه‌ندییانه‌ بده‌ین.

 

دابینكردنی‌ شایسته‌ داراییه‌كانی كه‌ركوك

ئاسۆ مامه‌ند له‌باره‌ی پێویستی به‌ده‌نگه‌وه‌هاتنی كه‌ركوك له‌لایه‌ن هه‌رێمه‌وه‌ وتی: ئێمه‌ له‌زۆر بۆنه‌ی تریش داوامانكردوه‌ كه‌ شایسته‌ داراییه‌كانی كه‌ركوك‌و له‌وانه‌ش پترۆ دۆلار بۆ كه‌ركوك دابینبكرێن، به‌تایبه‌تی‌ دوای ئه‌وه‌ی كه‌نه‌وتی كه‌ركوك له‌ڕێی بۆریه‌كانی‌ نه‌وتی‌ هه‌رێمه‌وه‌ هه‌نارده‌ی ده‌ره‌وه‌ ده‌كرێت‌و ده‌فرۆشرێت، هیواشی خواست حكومه‌تی هه‌رێم‌و هه‌روه‌ها حكومه‌تی عیراقیش كه‌ركوك له‌و مافه‌ی خۆی بێبه‌ش نه‌كه‌ن، چونكه‌ خه‌ڵكی كه‌ركوك مافی هه‌یه‌ كه‌داوای شایسته‌ داراییه‌كانی خۆی بكات بۆ ئه‌وه‌ی ته‌نیا بۆن‌و پیسی دوكه‌ڵی نه‌وته‌كه‌ی بۆ نه‌مێنێته‌وه‌، به‌ڵكو خزمه‌تی بكرێت‌و پێداویستییه‌كانی له‌هه‌موو رووه‌كانه‌وه‌ بۆ پر بكرێته‌وه‌، بۆیه‌ جارێكی تر داوا له‌حكومه‌تی هه‌رێمی كوردستان ده‌كه‌ینه‌وه‌ كه‌غه‌در له‌خه‌ڵكی كه‌ركوك نه‌كه‌ن‌و هه‌وڵ بده‌ن شایسته‌ داراییه‌كان بۆ ئه‌م شاره‌ دابین بكه‌ن.

ئه‌ندامی مه‌كته‌بی سیاسی‌و لێپرسراوی مه‌ڵبه‌ندی رێكخستنی كه‌ركوكی ی.ن.ك له‌باره‌ی كاریگه‌ری كێشه‌كانی نێوان هه‌رێم‌و به‌غداش وتی: به‌داخه‌وه‌ ده‌یڵێم لێپرسراوانی‌ هه‌رێم كه‌ چونه‌ته‌ به‌غدا كه‌متر باسی كێشه‌ی كه‌ركوكیان كردوه‌ و هاتوون ته‌نها باسی كێشه‌ی دارایی‌و نه‌وتیان كردوه‌ كه‌ رۆژانه‌ ئیداره‌ی كه‌ركوك روبه‌ڕوی كێشه‌ ده‌بێته‌وه‌ له‌گه‌ڵ به‌غداو من پێم وایه‌ به‌شێكی ئه‌و كێشانه‌ی روبه‌ڕوی كه‌ركوك ده‌كرێته‌وه‌ بۆ ململانێكانی نێوان هه‌رێم‌و به‌غدا ده‌گه‌ڕێته‌وه‌ و له‌گه‌ڵ ئه‌وه‌داین كه‌كێشه‌كانی نێوان حكومه‌تی هه‌رێم‌و حكومه‌تی عیراق به‌دیالۆگ‌و گفتوگۆ چاره‌سه‌ربكرێن‌و هیواخوازین ئه‌و وه‌فدانه‌ی دانوستانكار كه‌به‌مه‌به‌ستی دانوستان ده‌چنه‌ به‌غدا مه‌سه‌له‌ی كه‌ركوك له‌ئه‌وله‌ویه‌تی داخوازیه‌كانیان بێت بۆ ئه‌وه‌ی چیتر لایه‌نه‌ په‌یوه‌نداره‌كانی به‌غدا نه‌توانن ناهه‌قی‌و غه‌در به‌رامبه‌ر به‌ كه‌ركوك‌و خه‌ڵكی ئه‌م پارێزگایه‌ درێژه‌ پێ نه‌ده‌ن.

 

كێشه‌ی كه‌ركوك له‌ڕووی یاساییشه‌وه‌ چاره‌سه‌ر بكرێت

له‌باره‌ی ره‌وتی ئابوری‌و خزمه‌تگوزاریی له‌كه‌ركوك، لێپرسراوی‌ مه‌ڵبه‌ندی‌ رێكخستنی‌ ی.ن.ك له‌كه‌ركوك وتی: قه‌یرانی دارایی كاریگه‌ری له‌سه‌ر كه‌ركوك كردوه‌ و كاتی ئه‌وه‌ هاتووه‌ كه‌ كێشه‌كانی كه‌ركوك له‌و روه‌شه‌وه‌ چاره‌سه‌ر بكرێن، چونكه‌ ناكرێت نه‌وتی ئه‌م شاره‌ بفرۆشرێت‌و خه‌ڵكی ئه‌م شاره‌ له‌داهاتی نه‌وته‌كه‌یان بێبه‌ش بكرێن، ئه‌گه‌ر هه‌رێم‌و به‌غدا شایسته‌ داراییه‌كانی كه‌ركوك بده‌ن، ئه‌وا دۆخی خزمه‌تگوزاریی له‌كه‌ركوك بۆ پێشه‌وه‌ ده‌چێت، به‌تایبه‌تی‌ كه‌ له‌ئێستادا رێژه‌ی ئه‌و نه‌وته‌ی له‌كه‌ركوكه‌وه‌ هه‌نارده‌ ده‌كرێت زیاتره‌ له‌400 هه‌زار به‌رمیل نه‌وت كه‌ ئه‌وه‌ش داهاتێكی زۆر بۆ كه‌ركوك په‌یداده‌كات ئه‌گه‌ر بێتوو به‌شێوه‌یه‌كی شه‌فاف مامه‌ڵه‌ی له‌گه‌ڵدا بكرێت‌و پاره‌ی پترۆدۆلاری كه‌ركوكی لێ بدرێت، وتیشی: ئێمه‌ له‌ماوه‌ی رابردوودا سه‌ردانی به‌غدامانكردوه‌ و له‌نزیكه‌وه‌ چاومان به‌لێپرسراوانی به‌غداش كه‌وتوه‌ و بۆمان ده‌ركه‌وتوه‌ كه‌ به‌شێك له‌كێشه‌كانی كه‌ركوك په‌یوه‌ندییان به‌كێشه‌و ململانێكانی نێوان هه‌رێم و به‌غداوه‌ هه‌یه‌و هیوادارین بۆ داهاتوو به‌جدیتر كاربكرێت ئه‌و كێشانه‌ چاره‌سه‌ر بكرێن بۆ ئه‌وه‌ی ئه‌و رێگرییانه‌ی وه‌ك ده‌رهاویشته‌ی كێشه‌كانی نێوان هه‌رێم‌و به‌غدا بۆ كه‌ركوك دروست ده‌كرێت چاره‌سه‌ر بكرێن، ئه‌وه‌شی خسته‌ڕوو كه‌ به‌ بۆچوونی ئێمه‌ كێشه‌كانی به‌غدا له‌گه‌ڵ كه‌ركوك كێشه‌ی سیاسین‌و به‌شی زۆری هۆكاره‌كه‌ی بۆ ناكۆكی نێوان حكومه‌تی هه‌رێم‌و حكومه‌تی عیراق ده‌گه‌ڕێته‌وه‌، هیواشی خواست سه‌ركردایه‌تی كورد رۆڵێكی باشتر بگێڕێت له‌چاره‌سه‌ركردنی ئه‌و كێشانه‌ كه‌ ئه‌وه‌ به‌هیچ شێوه‌یه‌ك سازشكردن نییه‌ بۆ به‌غدا، به‌ڵكو هه‌وڵدانه‌ بۆ ئه‌وه‌ی كێشه‌كانی كه‌ركوك چاره‌سه‌ربكرێن‌و به‌وه‌ش ره‌وتی ئاوه‌دانی‌و خزمه‌تگوزاری له‌كه‌ركوك بۆ پێشه‌وه‌ ده‌چن‌و به‌نه‌تیجه‌ش ئه‌و دۆخه‌ خزمه‌ت به‌دۆزی سیاسی‌و ئه‌منی كه‌ركوكیش ده‌گه‌یه‌نێت، چه‌نده‌ په‌یوه‌ندییه‌كانی هه‌رێم‌و به‌غدا باشبێت، ئه‌وه‌نده‌ كێشه‌كانی كه‌ركوك كه‌متر ده‌بنه‌وه‌.

له‌باره‌ی ماده‌ی 140ه‌وه‌ ئاسۆ مامه‌ند وتی‌: رێگری بۆ جێبه‌جێكردنی ئه‌و ماده‌یه‌ كراوه‌ به‌ڵام له‌ڕووی دیفاكتۆوه‌ كه‌ركوك له‌ژێر كۆنترۆڵی هێزی پێشمه‌رگه‌دایه‌، به‌ڵام ئه‌مه‌ تائێره‌ به‌سه‌؟، من ده‌ڵێم نه‌خێر پێویسته‌ كێشه‌ی كه‌ركوك له‌ڕووی یاساییشه‌وه‌ چاره‌سه‌ر بكرێت‌و ئه‌مه‌ش پێویستی به‌وه‌ هه‌یه‌ كه‌له‌هه‌موو ئاسته‌كاندا كاری جددییانه‌ بۆ جێبه‌جێكردنی مادده‌ی 140 بكرێت.راشیگه‌یاند به‌پێویستی ده‌زانین له‌په‌رله‌مانی عیراق هه‌وڵه‌كان چر بكرێنه‌وه‌ بۆ تێپه‌راندنی ئه‌و پرۆژه‌ یاسایه‌ی كه‌جه‌نابی مام جه‌لال پێشكه‌شی په‌رله‌مانی عیراق كردوه‌ له‌باره‌ی ئاساییكردنه‌وه‌ی سنوری ئیداری پارێزگاكان‌و هاوكات كار بۆ هه‌ڵوه‌شانه‌وه‌ی ئه‌و بڕیارانه‌ی به‌عس بكرێت كه‌ بۆ ته‌عریبكردنی كه‌ركوك ده‌ریكردوون‌و هاوكاتیش كاربكرێت بۆ كاراكردنی لیژنه‌ی په‌رله‌مانی‌و حكومی ماده‌ی 140‌و چه‌ندین هه‌نگاوی تر، كه‌ده‌توانرێت له‌و رێگه‌یه‌وه‌ خزمه‌ت به‌مه‌سه‌له‌ی كه‌ركوك بكرێت

پـــەیـــوەنــدیــدار