ئەندام پەرلەمانێکی عێراق نامەیەکی کراوە ئاڕاستەی حکومەتی هەرێم دەکات

ئەندام پەرلەمانێکی عێراق نامەیەکی کراوە ئاڕاستەی حکومەتی هەرێم دەکات

نامەیەکی کراوە بۆ بەڕێزان…

 

بۆ بەڕێزان سەرۆکی حکومەتی هەرێمی کوردستان نێچرڤان بارزانی

                     جێگری سەرۆکی حکومەتی هەرێمی کوردستان قوباد تاڵەبانی

           وەزیری شەهیدان محەمەد حاجی صاڵح

 

 

بەڕێزان ئێمە دەزانین قەیرانی دارایی بەرۆکی هەرێمی کوردستانی گرتووە و بەغدا پارە بۆ هەرێم نانێرێت، شەڕی دژە ژیان و مرۆڤایەتیەکانی داعش، دابەزینی نرخی نەوتی خاو وای کردووە حکومەت بەتەواوەتی ماندووببێت بەدەست دابین کردنی بڕە پارەی پێویستەوە بۆ ئەوەی هەرێم لەسەر پێی خۆی بوەستێت و کاروبارەکانی بڕوات بەڕێوە، جێگەی پێزانینە ئەم لایەنە.

بەڵام لەلایەکی ترەوە بەهەدەردان و گەندەڵی و ناڕێکی و مووچەی زیادە و بندیوار و خانەنشینی حزبی و وەزیر و ئەندام پەرلەمان و پلە باڵاکان هەموو قورسایین لەسەر خەرجیەکانی حکومەت و دارایی گشتی هەرێمی کوردستان، ئەمەش جێگای رەخنەیە، هەرچەندە خۆشبەختانە لە میدیاکانەوە ئەوەمان بەرگوێ دەکەوێت جەنابتان لە هەوڵی ئەوەدان ئەو گرفتانە چارەسەر بکەن.

لەو بێنە و بەرەیەدا ئەوەی زۆر جێگەی ترس دڵەڕاوکێ و نیگەرانیە دابەشکردنی موچەی کەسوکاری شەهیدانی حکومەتی هەرێمی کوردستانە، راستە موچەکەیان کەمنەکراوەتەوە بەڵام بەپێی پلانەکە وا دیارە کراوەتە دوومانگ جارێک ئەمە جێگای قبوڵکردن نیە، چونکە ئەوانە کەسانێکن ئێمە لە سایەی گیان فیدای ئەوان ئارام دەژین، کورستان پارێزراوە و بەیانیان منداڵەکانمان ئەتوانن بڕۆنە بەر خوێندن بێ ترس و نیوەڕیانیش دەگەڕێنەوە.

ئەگەر گومانێک هەیە لەسەر لیستی شەهیدان ئەوە ئاساییە پێداچوونەوە بەناوەکان بکەنەوە و هەندێک بە واستە و حزبایەتی ناویان کراوە بە شەهید لە ناوی لیستەکاندا لایبەرن بەڵام بە دەردی موچەی کەمئەندامانیان نەبەن.

لەبەر ئەوەی کەسوکاری شەهیدان بەخێوکەرەکانیان گیانی خۆیان کردۆتە قوربانی خاکی کوردستان ئێستا لەهەر چینێکی تری ئەم نیشتمانە هەژارترن و پێوسیتیان بە ژەمێک خواردن هەیە، پێداویستیان بە جلوبەرگ هەیە، لە هەموو بۆنە و یاد و پرسە و چلەکانی ماتەمینی ئەوە یاد دەخەنەوە چەندە قەرزاری شەهیدانن بەڵام لە کردەیدا ئەوە دۆخی کەسوکاریانە کە دەیان بینین و لەبەرچاومانە، بڕۆنە بەردەم بانکێک کاتی دابەشکردنی موچەکان بزانن چەند باوک و دایکی جگەر سوتاو چاوەڕیی پارەی قوتی ژیانیانن.

بەڕێزان ئەمە کۆتا قسی منە” بەس بیهێننە بەرچاوی خۆتان منداڵەکانتان برسیان بێت حاڵتان چۆنە؟! ئایا موچەی کەسوکاری شەهیدان چەندە؟ چەند کاریگەری هەیە لەسەر خەرجیەکانی حکومەتی هەرێمی کوردستان؟ لە کاتێکدا ئێمە ژیان قەرزاری شەهیدانین.

 

رەنگین عەبدوڵا

ئەندامی لیژنەی شەهیدان لە پەرلەمانی عێراق

پـــەیـــوەنــدیــدار