به‌هرۆز گه‌ڵاڵی: یه‌كێتی دژی هه‌ر هێزێكی ده‌ره‌كیە سنووری كوردستان‌و سه‌روه‌ریی خاكه‌كه‌ی ببه‌زێنێت ‌

به‌هرۆز گه‌ڵاڵی: یه‌كێتی دژی هه‌ر هێزێكی ده‌ره‌كیە سنووری كوردستان‌و سه‌روه‌ریی خاكه‌كه‌ی ببه‌زێنێت ‌

«پڕۆسه‌ی ئاشتی له‌باكوور به‌بنبه‌ست گه‌یشتووه‌»
به‌هرۆز گه‌ڵاڵی: یه‌كێتی دژی ئه‌وه‌یە هه‌ر هێزێكی ده‌ره‌كی سنووری كوردستان‌و سه‌روه‌ریی خاكه‌كه‌ی ببه‌زێنێت ‌

10/12/2015

له‌گه‌ڵ هه‌رچی زیاتر ئاڵۆزبوونی دۆخی سیاسیی كوردستان له‌سه‌ر ئاستی ناوخۆیی به‌هۆی كێشه‌كانی په‌یوه‌ست به‌سه‌رۆكایه‌تیی هه‌رێم‌و په‌كخستنی كاری په‌رله‌مان‌و ته‌نگژه‌كانی ئابووریی‌و بێ مووچه‌یی خه‌ڵك‌و له‌سه‌ر ئاستی عیراقیش كێشه‌ هه‌ڵپه‌سێردراوه‌كانی نێوان هه‌رێم‌و به‌غداو كێشه‌ی نه‌وت‌و بودجه‌‌و جه‌نگی سه‌پێنراوی داعش به‌رۆكی كوردستانی گرتووه‌، كه‌ ئه‌و جه‌نگه‌ ئێستا ره‌هه‌ندێكی ئیقلیمی‌و نێوده‌وڵه‌تیشی وه‌رگرتووه‌. ئه‌گه‌رچی هه‌رێمی كوردستان نایه‌وێت بچێته‌ ناو ئه‌و بازنه‌ی ململانێ ئیقلیمییه‌وه‌ كه‌ به‌هۆی داعشه‌وه‌ كێشه‌ له‌مێژینه‌كانی نێوان وڵاتانی ناوچه‌كه‌شی زیندووكردۆته‌وه‌، به‌ڵام له‌نوێترین پێشهاتی مه‌ترسیداردا له‌دوای خستنه‌خواره‌وه‌ی فڕۆكه‌كه‌ی روسیا له‌لایه‌ن توركیاوه‌، كێشه‌ی نێوان ئه‌و دوو وڵاته‌ ئاڵۆزتربووه‌. به‌ڵام توركیا له‌جیاتی هه‌نگاونان بۆ هێوركردنه‌وه‌ی دۆخه‌كه‌، هێزێكی به‌قه‌باره‌ی نزیكه‌ی 600 سه‌رباز به‌چه‌كی قورس‌و تانك‌و تۆپخانه‌وه‌ هێناوه‌ته‌ به‌ناو خاكی هه‌رێمی كوردستاندا هێناوه‌ته‌ نزیك موسڵ‌و له‌یه‌كێك له‌ناوچه‌ «جێناكۆكه‌كان» جێگیری كردووه‌ به‌پاساوی مه‌شق‌و راهێنان به‌ ملیشیاكانی «حه‌شدی وه‌ته‌نی»، هاتنی ئه‌و هێزه‌ش ناڕه‌زایی گه‌وره‌ی له‌سه‌ر ئاستی میللی‌و حزبه‌كانی كوردستان لێكه‌وتۆته‌وه‌و هه‌موو حزبه‌كان «جگه‌ له‌پارتی دیموكراتی كوردستان» بێ ئاگایی خۆیان له‌هاتنی ئه‌و هێزه‌ به‌نایاسایی‌و پێشێلكردنی سه‌روه‌ریی خاكی كوردستان ده‌زانن، له‌وباره‌یه‌وه‌ هه‌ڤاڵ به‌هرۆز گه‌ڵاڵی نوێنه‌ری ی.ن.ك له‌دیدارێكیدا له‌گه‌ڵ كوردستانی نوێ ته‌ئكید ده‌كاته‌وه‌ كه‌ نه‌خۆی‌و نه‌ حزبه‌كه‌ی ئاگاداری هاتن‌و ئامانجه‌كانی ئه‌و هێزه‌ نین، ئه‌مه‌ی خواره‌وه‌ش پوخته‌ی دیداره‌كه‌یه‌:
دیداری: جه‌مال ئارێز
سه‌ره‌تا به‌هرۆز گه‌ڵاڵی له‌باره‌ی هاتنی ئه‌و یه‌كانه‌ی سوپای توركیاوه‌ ته‌ئكیدی كرده‌وه‌ كه‌ وه‌ك نوێنه‌ری یه‌كێتی‌و مام جه‌لال ئاگاداری هاتنی ئه‌و هێزه‌ی ده‌وڵه‌تی توركیا نییه‌‌و وتی: «نه‌له‌گه‌ڵمان دانیشتون‌و نه‌پرسیاریشیان پێكردووین، جگه‌ له‌وه‌ش وه‌ك یه‌كێتی له‌گه‌ڵ ئه‌وه‌ نین كه‌ هیچ هێزێكی ده‌ره‌كی سنووری هه‌رێمی كوردستان‌و سه‌روه‌ری خاكی كوردستان‌و عیراق پێشێل بكه‌ن».
توركیا چوبێته‌ هه‌ر وڵاتێك نه‌گه‌ڕاوه‌ته‌وه‌
له‌به‌شێكی دیكه‌ی قسه‌كانیدا رایگه‌یاند: هاتنی سوپای توركیا بۆ كوردستان‌و به‌تایبه‌تی ناوچه‌ كوردستانییه‌كانی ده‌ره‌وه‌ی سنووری هه‌رێمی كوردستان مه‌سه‌له‌یه‌كی مه‌ترسیداره‌و ترسناكه‌‌و پێیوابوو كه‌ مه‌سه‌له‌یه‌كی سیاسیی گه‌وره‌ی له‌پشته‌‌و ته‌نها بابه‌تێكی سه‌رپێیی نییه‌ چونكه‌ سوپای توركیا چووبێته‌ هه‌ر وڵاتێكه‌وه‌ نه‌گه‌ڕاوه‌ته‌وه‌. وتیشی: «ساڵی نه‌وه‌ده‌كان كه‌ له‌سه‌ر داوای لایه‌نێكی سیاسی هاتنه‌ كوردستانه‌وه‌ له‌كانی ماسی‌و ناوچه‌ی بامه‌ڕنی، سه‌رباری ئه‌وه‌ش كه‌ به‌م دواییانه‌ په‌رله‌مانی كوردستان بڕیاریدا بشێنه‌وه‌، به‌ڵام تائێستا نه‌كشاونه‌ته‌وه‌»
گه‌ڵاڵی پێیوابوو ئه‌وه‌ی ئێستاش وابه‌ئاسانی ناگه‌ڕێته‌وه‌‌و ته‌ئكیدیشی كرده‌وه‌ كه‌ حكومه‌تی هه‌رێمیش ئاگای لێ نییه‌، چونكه‌ پێنج حزب حكومه‌تیان دروستكردووه‌، ئێستا حزبێك له‌حكومه‌تدا ئاماده‌نییه‌، ده‌بێت چوار حزبه‌كه‌ی تر ئاگایان لێبێت، به‌ڵام شتی له‌وجۆره‌ له‌ئه‌نجومه‌نی وه‌زیرانیش باس نه‌كراوه‌، وتیشی: «كاتی خۆی به‌بڕیاری په‌رله‌مان پێشمه‌رگه‌مان نارد بۆ كۆبانێ، بۆیه‌ ده‌بێت هاتنی هه‌ر سوپایه‌كی ده‌ره‌وه‌ش به‌ڕه‌زامه‌ندیی په‌رله‌مان بێت، به‌ڵام ئه‌مه‌ بێ ئاگاداریی په‌رله‌مان‌و ته‌نانه‌ت حكومه‌تیشه‌».
مه‌سه‌له‌كه‌ هاوپه‌یمانیی ئیقلیمییه‌
له‌باره‌ی ئه‌وه‌ی ئاخۆ دوای ناڕه‌زایی سه‌رۆكایه‌تییه‌كانی عیراق‌و ئه‌و واده‌ 48 سه‌عاتییه‌ش كه‌ بۆیان دیاریكردوون، هه‌نگاوی داهاتووی عیراق چی ده‌بێت؟ به‌هرۆز گه‌ڵاڵی وتی: «بڕواناكه‌م روبه‌ڕوبونه‌وه‌ رووبدات» به‌ڵام پێیوابوو ئه‌و بابه‌ته‌ ببرێته‌ ئه‌نجومه‌نی ئاسایش‌و دوای لێدوانه‌كه‌ی سه‌رۆك كۆماریش باڵیۆزی توركیا له‌به‌غدا بانگكراوه‌ بۆ وه‌زاره‌تی ده‌ره‌وه‌ی عیراق‌و ناڕه‌زایی عیراقیان به‌ڕه‌سمی پێ راگه‌یاندووه‌»، ئاماژه‌ی به‌وه‌شكرد كه‌ ده‌بێت عیراق له‌گه‌ڵ ئه‌مریكا قسه‌ بكات، به‌ڵام رایگه‌یاند: كه‌ توركه‌كان پرس‌و راوێژیان له‌گه‌ڵ ئه‌مریكییه‌كان‌و یه‌كێتیی ئه‌وروپا كردووه‌، پێشیوانه‌بوو كه‌ یه‌كێتیی ئه‌وروپا به‌وه‌ رازی بێت، به‌ڵام وتی: مه‌سه‌له‌كه‌ هاوپه‌یمانێتییه‌كی ئیقلیمیی قه‌ته‌رو سعودیه‌و توركیایه‌ له‌گه‌ڵ لایه‌نێكی سیاسی كوردستان كه‌ ئاشكرایه‌ هاوكاریی ئه‌و به‌ره‌یه‌ ده‌كات كه‌ ئه‌و به‌ره‌یه‌ هه‌ڵوێستیان دیاره‌ له‌سه‌ر مه‌سه‌له‌ی داعش‌و په‌یوه‌ندییه‌كانیان له‌گه‌ڵ به‌غدا‌و زیاتر دژایه‌تی حكومه‌تی به‌غدا ده‌كه‌ن‌و پشتیوانیی سوننه‌ ده‌كه‌ن له‌ڕێگه‌ی تاریق هاشمی‌و ئه‌سیل نوجه‌یفی‌و هه‌ندێك سه‌ركرده‌ی دیكه‌وه‌ كه‌ هه‌وڵی ئه‌وه‌ ده‌ده‌ن كه‌ گوشار بخه‌نه‌ سه‌ر به‌غدا‌و شیعه‌‌و به‌گشتی بابه‌ته‌كه‌ په‌یوه‌سته‌ به‌ململانێی شیعه‌و سوننه‌وه‌.
چاودێریی رۆژئاوا
له‌به‌شێكی دیكه‌ی روونكردنه‌وه‌كانیدا پێیوابوو كه‌ ئێرانیش بێته‌ ناو كایه‌كه‌وه‌و هه‌ڵوێستی خۆیان بخه‌نه‌ڕوو. ئه‌و سه‌رسوڕمانی خۆی نیشاندا له‌باره‌ی هاتنی ئه‌و سوپایه‌ به‌قه‌باره‌ی 2000هه‌زار سه‌رباز كه‌ ئه‌وه‌ بۆ مه‌شق بێت بۆ ناوچه‌ی باشیك‌و وتی: «مه‌سه‌له‌كه‌ زیاتر په‌یوه‌ندیی به‌كوردستانی رۆژئاواو په‌یه‌ده‌و رزگاركردنی شه‌نگال‌و وجودی كورده‌وه‌ هه‌یه‌ له‌و ناوچه‌یه‌»‌و پێیوابوو توركیاش بیه‌وێت له‌و ناوچه‌یه‌ هێزێكی خۆی هه‌بێت‌و یارمه‌تیی توركمانه‌كانی ته‌له‌عفه‌ر بدات‌و له‌حاڵه‌تی پێویستیشدا چاودێریی رۆژئاوا بكه‌ن. چونكه‌ هه‌ندێك لایه‌نیش له‌باشووری كوردستاندا به‌بوونی ئه‌و كانتۆنانه‌ی رۆژئاوا نیگه‌رانن، پاشان وتی: چه‌ندین وڵات تیمی تایبه‌تیان ناردووه‌ بۆ كوردستان بۆ مه‌شقكردن به‌پێشمه‌رگه‌، به‌ڵام هیچ كام له‌وانه‌ له‌چه‌ند كه‌سێك تێپه‌ڕناكات‌و هیچ چه‌ك‌و زه‌خیره‌یه‌كیشیان پێ نییه‌.
ژیاندنه‌وه‌ی به‌ره‌ی كوردستانی
له‌به‌شێكی دیكه‌ی قسه‌كانیدا بۆ كوردستانی نوێ بڕوای خۆی نیشیاندا كه‌ ئێستا باشووری كوردستان پێویستی به‌دروستكردنی به‌ره‌یه‌كی حزبه‌ سیاسییه‌كانه‌ وه‌ك به‌ره‌ی كوردستانییه‌كه‌ی كه‌ كاتی خۆی سه‌ركردایه‌تی شۆڕشی كرد به‌رله‌ڕاپه‌ڕین، چونكه‌ ئێستا هه‌ست به‌جۆرێك له‌تاكڕه‌وی ده‌كرێت‌و بۆنموونه‌ له‌هه‌ولێر هیچ گوێ به‌حزب‌و لایه‌نه‌كانی تر نادرێت‌و گومانی هه‌بوو له‌وه‌ی هیچ سه‌ركرده‌یه‌كی حزبه‌ كوردستانییه‌كان ئاگایان له‌هاتنی سوپای توركیا بووبێت. وتیشی: «ئه‌م وڵاته‌ بێ خاوه‌ن نییه‌، ئه‌و حزبانه‌ ئه‌ندامیان هه‌یه‌ له‌په‌رله‌مان‌و جه‌ماوه‌رو ده‌نگده‌ریان هه‌یه‌‌و له‌په‌رله‌ماندان‌و له‌حكومه‌تدان، خێره‌ سوپای توركیا بێته‌ كوردستانه‌وه‌و ئه‌نجومه‌نی وه‌زیران ئاگادارنه‌بێت؟» هه‌روه‌ها وتی: ئه‌وه‌ی لێره‌ رووده‌دات له‌هیچ سیستمێكی سیاسیدا نه‌م بینیووه‌، چونكه‌ هه‌ر خودی سوپاسی توركیا بچن بۆ هه‌ر وڵاتێك ره‌زامه‌ندیی په‌رله‌مانی خۆیان ده‌وێت‌و ئێستا ئه‌و سوپایه‌ به‌ڕه‌زامه‌ندیی په‌رله‌مانی توركیا هاتووه‌، به‌ڵام دیارنییه‌ له‌كوردستان كێ بڕیاری له‌و مه‌سه‌له‌یه‌ داوه‌»‌و ئاماژه‌ی به‌وه‌شكرد كه‌ زۆر مه‌ترسیداره‌ كه‌سێك بڕیار له‌سه‌ر چاره‌نووسی كوردستان بدات، چونكه‌ پێیوابوو ته‌نانه‌ت نه‌ جێگری سه‌رۆكی هه‌رێم‌و نه‌ جێگری سه‌رۆكی حكومه‌تیش-یش ئاگایان له‌وه‌ نییه‌و پرسیان پێنه‌كراوه‌.
رای حزبه‌كان وه‌رناگیرێت
له‌به‌شێكی دیكه‌ی دیداره‌كه‌دا ئاماژه‌ی به‌وه‌كرد كه‌ پێشتر تیم هاتووه‌ پێنج بۆ شه‌ش كه‌س بۆ مه‌شق پێكردن، به‌ڵام به‌و قه‌باره‌یه‌ی ئێستا‌و به‌و بێ منه‌تییه‌ بچێته‌ ناوچه‌ جێ ناكۆكه‌كان ئه‌مه‌ مه‌سه‌له‌یه‌كه‌ كورد پێویسته‌ هه‌ڵویستی له‌سه‌ر بكات.
به‌هرۆز گه‌ڵاڵی وتیشی: چاوه‌ڕوانیی گۆڕانی گه‌وره‌ ده‌كرێت له‌خۆرهه‌ڵاتی ناوه‌ڕاستدا‌و پێویسته‌ كورد ناوماڵی خۆی به‌هێزبكات‌و ئه‌و كێشانه‌ی هه‌یه‌ چاره‌سه‌ری بكات ئه‌گه‌رنا ناتوانێت رووبه‌ڕووی ئه‌و گۆڕانكارییانه‌ ببێته‌وه‌ چ مه‌سه‌له‌ی داعش، دۆسێی نه‌وت‌و غاز، شه‌فافییه‌ت، ئاڵۆزیی په‌یوه‌ندییه‌كانی هه‌رێم‌و به‌غدا، ده‌بێت ئێستا كورد سه‌ركردایه‌تییه‌كی به‌هێزی هه‌بێت‌و هه‌موو حزبه‌كان پێكه‌وه‌ كۆببنه‌وه‌، ئه‌مه‌ به‌یه‌ك كه‌س ناكرێت، وتیشی: هه‌ستده‌كه‌م جۆرێك له‌تاكڕه‌ویی په‌یڕه‌وده‌كرێت‌و سه‌ردان ده‌كرێت‌و هیچ حزب‌و لایه‌نێك ئاگادار نییه‌، له‌سه‌ردان ده‌گه‌ڕێته‌وه‌ ئه‌گه‌ر كۆبونه‌وه‌یه‌ك بكرێت یان نه‌كرێ، ئاخۆ ئه‌مه‌ چۆن ده‌بێت وابێت؟ دیققه‌ت بده‌ن ئه‌گه‌ر وانییه‌ حزبێكی وه‌ك یه‌كێتی له‌هه‌ولێر 150 هه‌زار ده‌نگی هه‌یه‌، گۆڕان‌و حزبه‌كان تر كه‌ ژماره‌یه‌كی زۆر ئه‌ندام‌و په‌رله‌مانتاریان هه‌یه‌، خێره‌ ئه‌م حزبانه‌ ره‌ئیان وه‌رنه‌گیرێت؟
ئه‌جێنداكانی ئه‌و سوپایه‌ چین؟
نوێنه‌ری یه‌كێتی له‌ئه‌نقه‌ره‌ له‌باره‌ی گومانه‌كان له‌سه‌ر په‌یوه‌ندیی هاتنی ئه‌م سوپایه‌ بۆ كه‌مكردنه‌وه‌ی گوشاربێت له‌سه‌ر داعش، رایگه‌یاند: له‌سه‌ره‌تای دروستبوونی داعش‌و هاتنیان به‌ره‌و كوردستان‌و گرتنی شه‌نگال‌و چه‌ند شوێنێكی تر، له‌میدیاكان‌و له‌هه‌موو جیهان‌و له‌ناو خودی توركیاش چه‌ند رۆژنامه‌نووسێكی توركیا ئه‌وه‌یان بڵاوكرده‌وه‌ كه‌ ئه‌و بارهه‌ڵگرانه‌ی چه‌ك‌و زه‌خیره‌یان تێدابووه‌ بۆ داعش كه‌ئێستا له‌زینداندان، ئه‌و زانیارییانه‌‌و ته‌نانه‌ت ره‌خنه‌كانی وڵاتانی ئه‌وروپاش به‌رامبه‌ر توركیا كه‌ هه‌ڵوێستیان نه‌بووه‌ به‌رامبه‌ر به‌داعش، له‌به‌رئه‌وه‌ ئه‌و بابه‌ته‌ی داعش بابه‌تێكی ئاڵۆزه‌‌و له‌و بڕوایه‌دام هاتنی ئه‌و سوپایه‌و به‌وقه‌باره‌یه‌ كۆمه‌ڵێك ئه‌جێندای له‌پشته‌وه‌یه‌، یه‌كێك له‌وانه‌ش رۆژئاوای كوردستانه‌، به‌تایبه‌تب له‌دوای دروستبوونی كانتۆنه‌كانه‌وه‌ كه‌ حكومه‌تی توركیا زۆر به‌ئاشكرا دژایه‌تییان ده‌كات‌و ده‌ڵێت ئه‌وه‌ قبوڵ ناكه‌ین شتێكی تر وه‌ك «باكووری عیراق» له‌سوریا دروست ببێت.
یه‌كێتی دژی هاتنی هه‌موو سوپایه‌كه‌
له‌باره‌ی ئه‌وه‌ش كه‌ ئاخۆ هه‌ڵوێستی یه‌كێتی چییه‌و دوا هه‌ڵوێستی عیراق چی ده‌بێت، نوێنه‌ری یه‌كێتی له‌ئه‌نقه‌ره‌ رایگه‌یاند: كه‌ ئه‌و ناتوانێت له‌جیاتی مه‌كته‌بی سیاسی یه‌كێتی بیروڕای هه‌موو یه‌كێتی ده‌رببڕێت، به‌ڵام وتی: «وه‌ك نوێنه‌ری یه‌كێتی له‌توركیا ئێمه‌ وه‌ك یه‌كێتی به‌شێوه‌یه‌كی ره‌سمی به‌هیچ شێوه‌یه‌ك نه‌ئاگاداركراوین‌و نه‌پرسیشمان پێكراوه‌‌و نه‌كه‌س پێی وتوین سوپای توركیا دێته‌ ناو كوردستانی عیراقه‌وه‌»‌و راشیگه‌یاند: ئه‌وه‌نده‌ی ئاگاداربێت‌و سیاسه‌تی یه‌كێتیی خوێندبێته‌وه‌، یه‌كێتی پشتگیریی ئه‌وه‌ ناكات كه‌ توركیا یان هیچ هێزێكی ده‌ره‌كی بێت‌و له‌ناوچه‌یه‌كی كوردستانی عیراقدا جێگیر ببێت‌و پێشی وابوو كه‌ له‌چه‌ند رۆژی داهاتوودا مه‌كته‌بی سیاسی یه‌كێتی به‌ڕه‌سمی رای خۆی به‌خه‌ڵكی كوردستان راده‌گه‌یه‌نێت.
به‌هرۆز گه‌ڵاڵی وتیشی: ئێستا كاتی ئه‌وه‌یه‌ ئه‌و حزبانه‌ی له‌په‌رله‌مان‌و حكومه‌تدان‌و ئه‌وانی دیكه‌ش پێكه‌وه‌ دابنیشتن به‌رنامه‌یه‌ك دابنێن تا ئاگایان له‌یه‌كتریی بێت‌و پێكه‌وه‌ نه‌خشه‌ی داهاتوو دابنێن‌و بۆ هه‌ر ئه‌گه‌رێك خۆیان ئاماده‌بكه‌ن. كه‌ ئاخۆ كوردستان له‌گه‌ڵ به‌غدا به‌ره‌و كوێ ده‌ڕوات، بابه‌تی نه‌وت‌و غاز چی به‌سه‌ردێت، په‌یوه‌ندییه‌ ئیقلیمییه‌كانی كوردستان، ئه‌مه‌ كۆمه‌ڵێك كێشه‌ی گه‌وره‌ن كه‌ رووبه‌ڕووی خه‌ڵكی كوردستان بۆته‌وه‌‌و خه‌ڵك چوار مانگه‌ مووچه‌ی وه‌رنه‌گرتووه‌‌و چه‌ندین كێشه‌ی گه‌وره‌ هه‌ن كه‌ پێویسته‌ پێكه‌وه‌ دانیشتن‌و چاره‌سه‌رێكی واقیعی بۆ بدۆزنه‌وه‌‌و ناكرێت حزبێك سیاسه‌تی خۆی بكاته‌ سیاسه‌تی هه‌موو كوردستانی عیراق یان فه‌رزی بكات به‌سه‌ر حزبه‌كانی دیكه‌دا كه‌ ئه‌وه‌ قابیلی قبووڵ نییه‌، چونكه‌ گۆڕانی گه‌وره‌ به‌ڕێوه‌یه‌، به‌ڵام كورد خۆی بۆ حازر نه‌كردووه‌.
نابێت هێلكه‌كان بخه‌ینه‌ سه‌به‌ته‌ی سه‌ركرده‌یه‌كه‌وه‌
له‌باره‌ی ئه‌و ره‌فتارانه‌ی كه‌ ده‌یانه‌وێت دووباره‌ دابه‌شكردنی كوردستان به‌سه‌ر دوو زۆندا به‌رجه‌سته‌ بكه‌ن، نوێنه‌ری یه‌كێتی له‌ئه‌نقه‌ره‌ وتی: «وه‌ك ئه‌ندامێكی یه‌كێتی دژی دوو زۆنی‌و دوو ئیداره‌ییم، له‌لایه‌ك باسی ده‌وڵه‌تی كوردی ده‌كه‌ین‌و له‌لایه‌ك خۆمان دابه‌شی بكه‌ین ئه‌مه‌ كاره‌ساته‌» روونیشیكرده‌وه‌ كه‌ نابێ ته‌سلیمی لایه‌نێكی سیاسی ببین وه‌ك یه‌كێتی‌و نابێت هێلكه‌كانی خۆمان بخه‌ینه‌ سه‌به‌ته‌ی سه‌ركرده‌یه‌كه‌وه‌‌و ده‌بێت هه‌وڵبده‌ین سیاسه‌تی خۆمان لای خۆمان بێت. وتیشی: «ئه‌مه‌ی ئێستا سیاسه‌تێكی تاكڕه‌ویی تاك حزبییه‌‌و ده‌یه‌وێت به‌سه‌ر حزبه‌كانی تردا بیسه‌پێنێت، ئه‌مه‌ش هیچ په‌یوه‌ندیی به‌دیموكراسی‌و خه‌باتی په‌رله‌مانییه‌وه‌ نییه‌‌و سیاسه‌تی هه‌رێم نییه‌.
ئه‌و سیاسه‌ته‌ی ئێستا په‌یڕه‌و ده‌كرێت له‌لایه‌ك كێشه‌ی له‌گه‌ڵ په‌كه‌كه‌‌و باكوور، له‌گه‌ڵ په‌یه‌ده‌‌و رۆژئاوا دروست كردووه‌، ده‌بێت له‌سه‌ر كۆی رێكخستنی په‌یوه‌ندییه‌كان دابنیشین‌و پێكه‌وه‌ بزانین سیاسه‌تمان چۆن بێت به‌رامبه‌ر رۆژئاوا، په‌كه‌كه‌، ئێران، توركیا، سیاسه‌تمان سه‌باره‌ت به‌حكومه‌تی هه‌رێم‌و په‌رله‌مان‌و حزبه‌كان، ده‌بێت یه‌ك سیاسه‌تمان هه‌بێت‌و هه‌مووشمان به‌رگریی لێ بكه‌ین، به‌ڵام ئه‌گه‌ر ئێمه‌‌و ئه‌وانی تر ئاگامان له‌هیچ نه‌بێت به‌رگریی له‌چی بكه‌ین؟
نه‌توانین بڵێین چۆن هاتووه‌؟
له‌به‌شێكی دیكه‌ی قسه‌كانیدا وتی: به‌قسه‌ی توركیا فڕۆكه‌ روسییه‌كه‌ 17 چركه‌ هاته‌ ناو ئاسمانی خاكی توركیاوه‌ ئه‌و كێشه‌یه‌ی له‌سه‌ر دروستبوو، ئه‌ی باشه‌ ئه‌و هه‌موو كۆماندۆیه‌ی توركیا دێته‌ كوردستانه‌وه‌ نه‌توانین بڵێین چۆن هاتووه‌؟ لایه‌نێك به‌بێ ئاگاداریی ئه‌وانی تر بڵێت ئه‌وه‌ بۆ مه‌شق پێكردن هاتووه‌، ئه‌مه‌ بابه‌تێكی ئاڵۆزو قبوڵنه‌كراوه‌.
به‌باره‌ی پڕۆسه‌ی ئاشتیشه‌وه‌ له‌باكوور به‌هرۆز گه‌ڵاڵی وتی: «به‌داخه‌وه‌ پڕۆسه‌ی ئاشتی دوای ئه‌و دوو هه‌ڵبژاردنه‌ی دوایی‌و نێوان په‌كه‌كه‌و ده‌وڵه‌ت به‌بن به‌ست گه‌یشتووه‌‌و ماوه‌یه‌كی زۆه‌ ئه‌و وه‌فده‌ی سه‌ردانی ئیمراڵیان ده‌كرد رێگه‌یان پێ نه‌دراوه‌ بچنه‌ ئه‌وێ»، هیواشی خواست كه‌ كه‌شێكی وا دروست ببێت شه‌ڕ نه‌مێنێ‌و پارتی دیموكراتی گه‌لان به‌شێوه‌یه‌كی دیموكراسیانه‌ به‌شداریی بكه‌ن له‌خه‌باتی په‌رله‌مانییدا تا ئه‌و پڕۆسه‌یه‌ ده‌ستپێبكاته‌وه‌. وتیشی: «كاتی خۆی جه‌نابی مام جه‌لال رۆڵی زۆر گه‌وره‌ی بینی‌و ئێمه‌ش هاوكارییان بووین، ئێستاش وه‌ك یه‌كێتی ئاماده‌ین هه‌موو كۆمه‌كێك بكه‌ین بۆ وه‌ستانی ئه‌و شه‌ڕه‌.

پـــەیـــوەنــدیــدار

کـــۆمــێـنـت بــنــوســە