بەیاننامەی کۆمیتەی دیبلۆماسی هاوبەش سەبارەت دەسدرێژیەکانی تورکیا

بەیاننامەی کۆمیتەی دیبلۆماسی هاوبەش سەبارەت دەسدرێژیەکانی تورکیا

 

بۆ ڕای گشتی

 

هێرشەکانی تورکیا بۆ سەر کوردستان راگرن!

 

لە کاتێکا گەلی کوردستان لە باشوورو رۆژاوای وڵات لە شەڕێکی دژواردان بەرامبەر هێزی تاریک و تیرۆریستی داعش. نەبەردانە بەرگریی لە وڵاتەکەیان و بەها مرۆڤایەتیەکان ئەکەن و، بە هەزاران قوربانیان لەو پێناوەدا داوە. لە زۆر شوێن چۆکیان بە تێرۆریستان داداو پاشەکشەیان پێکردن و گەلێک ناوچە لە تێرۆریستان پاککرایەوە. هەیبەتی ئەو هێزە تاریکەیان شکاند کە جیهان و دەوڵەتە ناوچەییەکان لە بەرامبەریدا دەستەوستان بوون. ئەم سەرکەوتنانەی گەلی کوردستان بووە مایەی هاوسۆزیی و هاریکاریی رای گشی و فەرمیی جیهانی بۆ کوردستانیان و، پێگەی کوردستانیانی وەک ئەکتۆرێکی کاریگەر لە رۆژهەڵاتی ناوەڕستا بەهێزکرد. لە سەر ئاستی جیهانیش تەکانێکی بەهێزی دا بە تێگەیشتن لە خەباتی ئازادیخوازانەی کوردستان.

لەهەمانکاتا زیاتر جێگیربوونی دەسەڵاتی خۆبەڕیوەبەریی لە رۆژاوای کوردستان و، ئەگەری بەهێزی یەکگرتنەوەی سەرجەم هەرێمەکانی رۆژاوا تا نزیک دەریای ناوەڕست. هەروەها سەرکەوتنەکانی گەلی باکوری کوردستان لە هەڵبژاردن و بڕیاری خۆبەڕیوەبردن. ئەمانە بۆ توکیاو هاوپەیمانەکانی مایەی قبوڵکردن نەبوو. بۆیە تورکیا درێژەی بە هێرشەکانی دا بۆ سەر باکورو رۆژاواو باشووری کوردستان. هەروەک ئەزانن لە باکور هێڕشی دڕندانە ئەکرێتە سەر شارەکانی کوردستان و، جگە لە وێرانکاریی، بەدەیان کەسی سڤیل شەهید و برینداربوون و، زیانێکی زۆر بە ماڵ و گوزەرانی خەڵک کەوتووە. هێرشەکانی دەوڵەتی تورکیا هەر بەمانەوە نەوەستان. هێرش بۆ سەر شارەکانی باکورو، هاریکاری داعش و بۆردومانکردنی ناوچەکانی قەندیل بەس نەبوون. کار گەیشتە ئەوەی بێ گوێدانە پرەنسیپە نێونەتەوەییەکان، بە هێزێکی زۆرەوە سنووری باشووری کوردستان ببەزێنێت و لە زۆر شوێن هێزەکانی جێگیر بکات و بنکەکانی پێشووتریشی بەهێزتر بکات. ئەم پێشێلکارییەی تورکیا زۆر ئامانجی ستراتیژی و سیاسی و ئابووری لە پشتەوەیە. جگە لەوەی کە هەوڵێکە بۆ دابڕانی باشوورو رۆژاوا لەیەکترو، لاوازکردنی پێگەی سەربازی و سیاسی و ئیداریی کوردستان. لە هەمانکاتا ئاڵۆزی و قەیرانە ئابووری و سیاسی و ئیداری و کۆمەڵایەتیاکانی باشووری کوردستانیش، کە هەر ئێستا بە دەستیانەوە ئەناڵێنێ، قوڵتر ئەکاتەوە. ئەگەری ئەوەش هەیە کە ئاگری شەڕێکی تر لە ناوچەکەدا هەڵگیرسێنێ، کە زەرەرمەندی یەکەم تیایدا خەڵکی کوردستان ئەبێت.

ئێمە وەک کۆمیتەی دیپلۆسیی هاوبەش لە نەرویج، کە لە ژمارەیەک نوێنەرانی پارت و رێکخراوە کوردستانیەکان پێکهاتووە، بە توندی ئیدانەی ئەم پێشێلکاریەی تورکیا ئەکەین. داوا لە گەلی کوردستانیش ئەکەین ئەوە قبوڵ نەکەن و سەروەری خۆیان و هەرێمەکەیان لەبەرامبەر هەر دەستدرێژیەک بپارێزن. هەمانکات داوا لە رای فەرمی و گشتی نێونەتەوەیی ئەکەین کە هەڵوێستی خۆیان لە دژی ئەم هەنگاوەی تورکیاو هەر هەنگاوێکی تری هاوشێوەی دەڵەتانی ناوچەکە دەربڕن و رێگری لێبکەن.

 

16.12.2015

کۆمیتەی دیپلۆماسیی هاوبەشی پارت و رێکخراوە کوردستانیەکان لە نەرویج

  1. کۆنگرەی نەتەوەیی کوردستان- ک.ن.ک
  2. یەکێتی نیشتیمانی کوردستان
  3. پارتی یەکێتی دیموکراتیک- پەیەدە
  4. بزووتنەوەی گۆڕان
  5. یەکگرتووی ئیسلامیی کوردستان
  6. پارتی ژیانی ئازادی کوردستان-پژاک
  7. حیزبی شیوعی کوردستان
  8. ئەنجومەنی گەل- ئۆسلۆ
  9. حیزبی سۆسیالیست دیموکراتی کوردستان
  10. تەڤگەری ئازادی کۆمەڵگەی کوردستان

12388299_10153787632476764_1503104598_n 12367045_10153787632956764_1681251562_n

 

 

 

 

 

پـــەیـــوەنــدیــدار

کـــۆمــێـنـت بــنــوســە