کەنەدا ، کۆمیتەی ڕێکخستنی کەنەدا سەردانی کوردیش کۆمینێتی تورونتۆ دەکات          

کەنەدا ، کۆمیتەی ڕێکخستنی کەنەدا سەردانی کوردیش کۆمینێتی تورونتۆ دەکات          

 

لە دانیشتنێکی دۆستانەدا کە ماوەی دوو کاتژمێری خایاند لە نێوان کۆمیتەی رێکخستنی کەنەدای یەکێتیی نیشتمانیی کوردستان و برایانی کوردیش کۆمینێتی سەنتەر بە گشتی باس لە بارودۆخی ئێستای سیاسی و کوردستان و پەیوەندی مێژوویی نێوان یەکێتیی نیشتمانیی کوردستان و پارتی کرێکارانی کوردستان و کۆمیتەی رێکخستن و سەنتەری کوردانی باکوور بەتایبەتی لەسەر ئاستی وڵاتی کەنەدا بۆ پەڕەپێدانی پەیوەندییەکان و کاری هاوبەشی پێکەوەیی  لە داهاتوو لە پێناو بەرژەوەندی ڕەوەندی کورد تاوتوێکرا .

شاندی کۆمیتەی ڕێکخستن پێك هاتبوون لە لێپرسراوی کۆمیتە سەباح عەنکاوەیی و کارگێڕو ئەندامانی کۆمیتە مام ئیسماعیل و یاسین قادر و عوسمان عەلی وخەسرەو رەسول ، هەروەها دوکتۆر ڕێبوار ئیسماعیل جێگری مەڵبەندی سێی یەکێتیی نیشتمانیی کوردستان کە بەسەردانێك لە وڵاتی کەنەدایە ئامادەی دانیشتنەکە بوون .

سەرەتا بە ڕاوەستانی خولەکێك بۆ رێزلێنان لە گیانی پاکی شەهیدانی کوردستان دانیشتنەکە دەستی پێکرد.

پاشان ئیحسان کایە بەرپرسی رێکخراوی کوردیش کۆمینێتی سەنتەر لە تورونتۆ بەخێر هاتنی هاوڕێیانی کۆمیتەی رێکخستنی کەنەدای ( ی ن ك ) کرد . کایە لە بەشێکی وتەکەیدا ئاماژەی بە بارودۆخی خۆپیشاندانی گەنجانی شارەکانی باکووری کوردستان داو و وتی  پاش سەرکەوتنەکانی گەلی باکووری کوردستان لە هەڵبژاردنەکان ، دەوڵەتی تورکیا رۆژانە ئۆپەراسیۆنی دڕندانە بۆ سەر هاوڵاتیان و لایەنگرانی هەدەپە ئەنجام ئەدات ، وێڕای وێرانکردن زیانێکی گەورەی بە ماڵ و گوزەرانی خەڵک گەیاندووە ، بە دەیان هاوڵاتی سڤیل شەهید و برینداریش کردووە .

سەباح عەنکاوەیی لێپرسراوی کۆمیتەی رێکخستنی کەنەدا سوپاسی پێشوازی گەرمی برایانی کوردیش کۆمینێتی کرد و خۆشحاڵی کۆمیتەی بۆ دانیشتنەکە نیشاندا ، پاشان کورتە باسێکی ڕەوشی سیاسی هەرێمی کوردستان و شەڕی چەکدارانی داعش  پێشکەشکرد .

لەو دانیشتندا کە  دوکتۆر رێبوار ئیسماعیل پەرلەمانتاری پێشووی هەرێمی کوردستان و جێگری مەڵبەندی ٣ ی ئێستای ( ی ن ك ) ئامادەی بوو لە وتەیەکدا ئاماژەی بە بارودۆخی سیاسی هەرێمی کوردستان و سەرکەوتنەکانی هێزی پێشمەرگە و شەڕڤانانی یەپەگە و گەریلا لە شەڕی دژە تیرۆر دا ، لە بارەی هەنگاوەکانی پرۆسەی ئاشتی لە تورکیا ، دوکتۆر رێبوار وتی ئەگەر هەنگاوەکانی پرۆسەی سیاسی لە باکووری کوردستان بە ئاشتیانە بەڕێوە بچێت ئەوا لە قازانجی گەلی کوردە بەگشتی ئێمەش وەکو یەکێتیی نیشتمانیی کوردستان بە سەرکەوتنێکی گەورە و پشتیوانی لێدەکەین . بەڵام بەداخەوە دەبینین دەوڵەتی تورکیا بە پێچەوانەوە رۆژانە هێرش و پەلاماری سەربازی بۆ سەر ناوچە کورد نشینەکان ئەنجام ئەدات و خەلکی بێتاوان شەهید دەکات ، هیوادارین دەوڵەتی تورکیا لە پێناو سەقامگیری ئاسایش و ئاشتی پێکەوە ژیانی نەتەوەکان  ملکەچی پرۆسەی ئاشتی بێت .

لە تەوەرێکی باسی رۆژئاوادا جێگری مەڵبەندی ٣ ی یەکێتی تیشکی خستە سەر خۆڕاگری وئازایەتی هێزەکانی شەڕڤانانی یەپەگە و یەپەژە لە بەرەکانی شەڕی تیرۆرستانی داعش دا کە توانییان نموونەیەکی قارەمانانە لە کوبانی پێشکەش بە نێو دەوڵەتی بکەن و ببنە هێزێکی نەتەوەیی کە گەلی کورد و وڵاتانی هاوپەیمانان شانازی پێوە دەکەن ، دوکتۆر رێبوار لە کۆتایی وتەکەیدا دەسەڵاتی ئیدارەی خۆجێی کانتۆنەکانی رۆژئاوای بەرز نرخاند و کە ئیدارەیەکی سەرکەوتووە ، توانیویەتی کورد لە ژێر چەتری کانتۆنەکاندا کۆبکاتەوە و هەڵبژاردنی ئۆرگانەکانی شارەوانی و پەروەردە و ئاوەدانکردنەوەی رۆژئاوا ئەنجام بدات، بێگومان ئەمە هەنگاوێکی گەورەیە لە مێژووی ئیدارەی کوردانی رۆژئاوا ، وەکو یەکێتیی نیشتمانیی کوردستان بەردەوام پشتگیری لە هەنگاوەکانی خەلکی رۆژئاوا دەکەین و هیوای پێشکەوتنی زیاتریان بۆ دەخوازین .

لە میانەی گفتوگۆی بەشداربووان هێرشەکانی هێزی ئاسایش و پۆلیسی تورکیا بۆ سەر شارەکانی باکوری کوردستان و هاتنی سوپای تورکیا بۆ باشووری کوردستان ئیدانە و شەرمەزار کرد ، هەردوولا ڕایان وایە جێگیرکردنی سوپای تورکیا لە باشووری کوردستان پێشێلکاری سەروەری خاکی کوردستان و عێراقە و ئامانجی ستراتیژی و سیاسی و لە پشتەوەیە ، هەروەها سەرکەوتن و خۆڕاگری گەلی کورد لە شەڕی تیرۆرستانی داعش بەرز نرخاند کە بووە مایەی هاوسۆزی و هاوکاری ڕای گشتی و وڵاتانی هاوپەیمانان بۆ گەلی کورد .

لە کۆتاییدا ئامادە بووان هیوایان خواست ئەم جۆرە سەردانانە بەردەوام بێت تا لە نزیکەوە لەم هەلومەرجە هەستیارەدا کاری هاوبەشی بۆنە نەتەوەییەکانی گەلی کورد لە پێناو خزمەتکردنی پرۆسەی سیاسی هەموو پارچەکانی کوردستان جێبەجێ بکەن .

عوسمان عەلی ، تورونتۆ

22

 

 

 

 

پـــەیـــوەنــدیــدار

کـــۆمــێـنـت بــنــوســە