کەنەدا ،  نۆیەم فیستیڤاڵی کولتووری ماڵی کورد بەڕێوەچوو

کەنەدا ، نۆیەم فیستیڤاڵی کولتووری ماڵی کورد بەڕێوەچوو

عوسمان عەلی ، تورونتۆ

لە ژێر ناونیشانی ( یەکگرتن لە پێناو ئاشتی و ئازادی و دیموکراسی ) ، رۆژی 15/10/2016  لە سەنتەری مالیسمان – ی شەقامی یانگ ستریت لە شاری تورونتۆ، نۆیەمین فیستیڤاڵی ساڵانەی کولتووری کوردی بە ئامادەبوونی ژمارەیەکی زۆری کوردانی ئۆنتاریو و خەلکی بیانی بەسەرپەرشتی ماڵی کوردی تورونتۆ بەڕێوەچوو.

سه‌ره‌تا به‌ سروودی نه‌ته‌وه‌یی ( ئۆ که‌نه‌دا و ئه‌ی ره‌قیب ) وخولەکێك راوه‌ستانی بێده‌نگی بۆ گیانی پاکی شه‌هیدانی رێگای رزگاری کوردستان و شەهیدانی شەڕی دژە تیرۆر ده‌ستی پێکرد .

لەو فیستیڤاڵەدا کە ژمارەیەکی بەرچاوی خەڵکی بیانی نەتەوە جیاوازەکانی نیشتەجێی شاری تورونتۆ ئامادەی بوون ، چەندین چالاکی جۆراوجۆری هونەری و کولتوری کوردی میوزیك و سه‌مای کوردی بۆ ناساندنی فەرهەنگ وکلتوری کوردی به‌ گه‌لانی جیهانی له‌م وڵاته‌ پێشکه‌شکران .

هونەرمەند عەلی زەندی بە دەنگە سۆزەکەی کۆپڵەیەك ئاواز و گۆرانی فولکلۆری کوردی بەبەشداری هەڵپەڕکێی ئامادەبووان ئاهەنگەکەی ڕازاندەوە .

سام فەرنادز بەڕێوبەری پۆلیسی سەنتەری ناوچەی 32  لەوتەیەکدا خۆشحاڵی خۆی نیشاندا کە بەشداری فیستیڤاڵی نەتەوەی کوردی کردووە  وە سوپاسی ماڵی کوردیشی کرد کە بانگهێشتی فیستیڤاڵەکەیان کردووە ، بەڕێوبەری پۆلیس لە وتەکەیدا وتشی سازدانی ئەم جۆرە فیستیڤاڵانە ڕەنگ وکولتووری نەتەوە جیاوازەکان لەیەك نزیکدەکاتەوە و زیاتر ئاشنای هونەر و کولتووری یەکتر دەبن .

مەزلوم مەرۆگی لێپرسراوی کۆمەڵەی سریانی وکلدانی و ئاشوری لە وتەیەکدا بەو بۆنەوە پیرۆزبایی نۆیەمین فیستیڤاڵی کوردی لە ئامادەبووان کرد ، مەڕۆگی لە بەشێکی وتەکەیدا سوپاسی حکومەتی هەرێم و خەڵکی کوردستان بە گشتی کرد کە بەهانای زیاتر لە دووسەد هەزار ئاوارەی مەسیحی و شەبەك و ئیزیدییەکانی کە لەناوچەکانی موسل و شەنگار و باشێك بەهۆی هێرش و پەلاماری تیرۆرستانی داعش ماڵ و حاڵی خۆیان جێ هێشتبوو . لە کۆتاییدا بەرپرسی کۆمەڵەکە وتشی خۆشحاڵین لەم رۆژانەدا هەموو ئامادەکاری هێزەکانی پێشمەرگەو سوپای عێراق و هاوپەیمانان بۆ شەڕی لەناوبردنی یەکجارەکی تیرۆرستانی داعش جێبەجێ کراوە و بەو ئۆمێدەی کۆتایی  بە چەکدارانی داعش لە شاری موسل و هەموو خاکی عێراق بهێنرێت .

لوسی ئۆسایان سەرۆکی رێکخراوی خێرخوازی ئێزیدییەکان لە واشنتۆن لە پەیامەکەیدا ئاماژەی بە قوربانیانی کۆمەڵکوژی و ڕفاندنی ژنان و کچانی ئێزدی دا و وتی لە تەواوی ڕێکخراوە نێودەوڵەتییەکان پشتگیری و هاوکاری ئیزیدییەکان کراوە بەتایبەتیش ئەوانەی لە زیندان و تراژیدیای دڕندانەی داعش رزگاریان بووە  . لەکۆتایی وتەکەیدا ئوسایان رایگەیاند ئێستا شەڕێکی چارەنوسساز لە ئارادایە بۆ لە ناوچوونی تیرۆرستان و رزگارکردنی تەواوی ڕفێنراوەکان .

وێنەو تابلۆکانی هونەرمەندی شێوەکار حاجی خانم  کە خاتوو ئاسیا نمایشی کردبوو دیمەنێکی جوانی بە فیستیڤاڵەکە بەخشیبوو.

لە میانەی فیستیڤاڵەکەدا تیپی هونەری میللی ماڵی کورد ڕێپێوانێکی نمایشی جلوبەرگی کوردی ناوچەکانی کوردستانی پێشکەشکرد ودواتر و چەند پارچە ئاوازێکی گۆرانی و هەڵپەرکێی فۆلکلوری دەهوڵ و زورنای پێشکەش ئامادەبووان کرد .

لە فیستیڤاڵی نۆیەمی کلتووری کوردیدا گروپی دیلان دانس خاتو سەوسەن تابلۆیەکی سەمای هیندی پێشکەشکرد .

دوا چالاکی فیستیڤاڵه‌که‌ بریتی بوو لە گۆرانی نه‌ته‌وه‌یی و ئاوازی فۆلکلوری هونه‌رمه‌ندان ڕشدی کێستەیی و شاروز و شاهۆ عەندەلیب  به‌ هاوکاری تیپی میوزیك و  زه‌ماوه‌ندی کوردستانیان به‌ جلوبه‌رکی ڕازاوەی کوردی تا کاتژمێر نۆی شەو  فیستیڤاڵه‌که‌یان ڕازانده‌وه‌  .

لە کۆتاییدا چەتۆ وانی بەرپرسی ماڵی کوردی تورونتۆ لە وتەیەکی کورتدا سوپاسی  ئامادەبووانی کرد ، لە بەشیکی وتەکەیدا وانی ئاماژەی بە ڕۆل و خۆڕاگری هێزە قارەمانەکانی پێشمەرگە و گەریلا و شەڕڤانان کرد لە بەرەکانی شەڕی دژە تیرۆردا ، هەروەها وتشی هیوادارین هەموو لایەنی سیاسی و خەلکی کوردستان  یەک ریز و یەکگرتووبن بۆ بەدی هێنانی ئامانجی داهاتووی گەلەکەمان لە دوای لەناو بردنی چەکدارانی داعش لە ناوچەکە  .

جێی ئاماژەیە فیستیڤاڵی ساڵانەی کولتووری کوردی کەرنەڤاڵێکی هونەری ڕازاوەیە و بەسەدان هاوڵاتی کورد و بیانی بەشداری تێدا دەکات و هەلێکی گرنگە بۆ ئاشنابوونی نەتەوە جیاجیاکانی نیشتەجێی تورونتۆ بە فەرهەنگ و پۆشاکی جلوبەرگ و مێژووی سیاسی و چالاکی هونەری موسیقا و سەمای  کوردی  .

  • 64
  • 63
  • 62
  • 61
  • 60
  • 59
  • 58
  • 57
  • 56
  • 55

پـــەیـــوەنــدیــدار