وتەبێژی ئەنجومەنی ناوەندی وەڵامی حاجی کاروان دەداتەوە

 وتەبێژی ئەنجومەنی ناوەندی وەڵامی حاجی کاروان دەداتەوە

 

 

 

 

 

وتەبێژی ئەنجومەنی ناوەندی یەکێتی نیشتیمانی کوردستان وەڵامی زانیارییە ناراستیەکانی حاجی کاروان  ئەندامی پەرلەمانی کوردستان لە فراکسیۆنی یەکگرتووی ئیسلامى دەداتەوە کە لەبەرنامەی تاوتوێی کەناڵی NRT لە رۆژی چوار شەممەی رابردوو رایاگەیاند کادیرانی یەکێتی بۆیە بێدەنگن چونکە کێشەی داراییان نیە و مانگانە موچەی خۆیان وەردەگرن.

لەتیف نێروەیی لە لێدوانێکی تایبەتدا بۆ سایتی ئەنجومەنی ناوەندی  رایگەیاند:”  هەر چەندە پرسی موچەی کادیرانی یەکێتی بابەتێکی ناوخۆی حزبیە، بەڵام پێدەچێت خەڵکێک بڕوا بە قسەکانی  حاجی کاروان بکات، بەپێویستمان زانی ئەو راستیە بۆ کۆمەڵانی خەڵکی کوردستان بخەینە روو کە کادیرانی یەکێتی وەکوو هەموو کارمەند و فەرمانبەرانی هەرێم قەیرانی دارایی کاریگەری نەرێنى لەسەر ژیان و گوزەرانیان دروست کردوە ، لەسەرەتای ئەمساڵەوە 2016 کادیر و کارمەندانی یەکێتی تەنها شەش موچەیان وەرگرتوە ، واتە موچەی مانگەکانی (7،8،9،10) یان وەرنەگرتوە ، ساڵی رابردودیش واتە 2015 تەنها هەشت موچەیان وەرگرتوە و موچەی چوار مانگیان وەرنەگرتوە .

وتیشی: ئەو زانیارییە نادروستانەی حاجی کاروان زوڵمێکی گەورەیە لە کادیرانی یەکێتی دەکات، پەرلەمانتار ئەگەر بەر لە بڵاوکردنەوەی هەر پەیڤێک یان پەیامێک یەکجار بیربکاتەوە لە پێناو راستی زانیارییەکان ئەوا پێویستە حاجی کاروان چوار جار بیربکاتەوە وەک (حاجی ، بانگخواز، سەرکردایەتی حزبێک، پەرلەمانتار) چونکە هەر یەکێک لەم کەسایەتیانە ئەگەر زانیاری هەڵە بڵاو بکاتەوە متمانەی جەماوەر لەدەست دەدات، سەبارەت بە بێ دەنگی کادیرانی یەکێتیش ، ناوبراو زوڵمێکی دیکە لە لە کادیرانی یەکێتی دەکات، هەروە وەک خۆی دەڵێت ” ئەزموونی سیاسیم نیە”  گریمان بەهۆی کەمی ئەزموونی سیاسیەوە کادیرانی یەکێتی نەناسێت ئەی چۆن هەڵوێستی راشکاوانە و بوێرانەی ئەو کایرە یەکێتیانە لەبیردەچێت کە ئەندامی پەرلەمانی کوردستان و هاوکار و هاورێی کاک حاجی کاروانن و هەمیشە خاوەن دەنگێکی زوڵاڵن لە هەڵوێست وەرگرتن لە پێناو ماف و خزمەتکردنی خەڵکی کوردستان.

لەتیف نێرەوەی لە لێدوانەکەیدا ئاماژەی بۆئەوەشکرد:” بریا حاجی کاروان بەر لە درکاندنی ئەو زانیارییە نادروستانە بەدواداچوون یان پرسێکی بە ئۆرگانێکی یەکێتی بکردایە ئەو کاتە توشی ئەو هەڵە نەدەبوو کە بوەتە هۆی نیگەرانی هەزاران کادیری یەکێتی نیشتیمانی کوردستان.

سایتی ئەنجومەنی ناوەندی

 

پـــەیـــوەنــدیــدار