کەنەدا ، کوردانی هەرێمی ئونتاریۆ پشتیوانی پەرلەمانتارانی HDP دەکەن

کەنەدا ، کوردانی هەرێمی ئونتاریۆ پشتیوانی پەرلەمانتارانی HDP دەکەن

 

عوسمان عەلی ، تورونتۆ
 

لە درێژەی هەڵمەتی بەرفراوانی ڕەوەندی کوردانی دەرەوەی وڵات بۆ دەربڕینی ناڕەزایی و شەرمەزارکردنی سیاسەتی رەگەزپەرستی حکومەتی تورکیا بەرامبەر بە کوردانی باکوور و  دەستگیرکردنی هاوسەرۆك و ژمارەیەك  پەرلەمانتار و لایەنگرانی پارتی دیموکراتی گەلان HDP ، ئێوارەی رۆژی 12/11/2016 بەسەرپەرشتی کوردیش کۆمینێتی سەنتەر خۆپیشانێکی جەماوەریی بە بەشداری نوێنەری پارت و ڕێکخراوە کوردییەکان و ژمارەیەکی زۆری کوردستانیانی هەرێمی ئۆنتاریو خەلکانی بیانی و کەناڵەکانی ڕاگەیاندنی CP24   و Global TV لە شاری تورونتۆ بەڕێوەچوو .

لەو ڕێپێوانەدا خۆپیشاندەران بە درێژایی شەقامەکانی یانگ و بلوور و دۆنداس تا بەردەم گۆڕەپانی پارێزگا ( ستی هۆڵ ) بەهەڵگری ئاڵای کوردستان و دروشمی جۆراوجۆر سیاسەتی دڕندانەی ئەردوگان و حکومەتی تورکیا سەبارەت بە دەستبەسەرکردنی هاوسەرۆك و پەرلەمانتارانی HDP ئیدانە و مەحکومکرد .

پاشان لە گردبوونەوەیەکدا لەبەردەم گۆڕەپانی پارێزگا لە ستی هۆڵ ، کوردستانیان بە دروشمەکانیان پشتیوانی خۆیان بۆ پەرلەمانتارانی هەدەپە دووپاتکردەوە و سیاسەتی ڕەشبگیری هاوڵاتیانی مەدەنی و پەرلەمانتارانی کورد ئیدانە کرد . هەر لە میانەی گردبوونەوەکەدا کوردیش کۆمینیتی سەنتەر لە بەیاننامەیەکدا سوپاسی  لایەنی سیاسی و رێکخراوەکان و ئامادەبووانی کرد کە بەردەوام پشتگیری خۆیان بۆ داخوازییەکانی کوردانی باکوور و پەرلەمانتارانی هەدەپە نیشانداوە . لە بەشێکی بەیاننامەکەدا کۆمیتەی کوردی داوای لە حکومەت و پەرلەمانی کەنەدا کرد پشتیوانی مافی ڕەوای گەلی کورد بە گشتی بکەن و سنوورێك بۆ دەستدرێژی هێزەکانی پۆلیسی تورکیا و دەستگیرکردنی لایەنگرانی پارتی دیموکراتی گەلان HDP لە باکووری کوردستان دابنێن .

دواتر گورکان ئۆرمان پەیامی هاوسەرۆك و پەرلەمانتارانی دەستبەسەرکراوی HDP کە لە گرتووخانەی ئەستانبوڵەوە ئاراستەی خۆپیشاندەرانیان کردبوو خوێندەوە ، لە پەیامەکەدا پەرلەمانتارانی هەدەپە سڵاو رێزیان ئاراستەی هەموو نەتەوەکانی تورکیا و ئەوانەی خۆپیشاندان بۆ پشتگیری و ئازادکردنی پەرلەمانتارانی HDP  دەدەن کرد . لە کۆتایی پەیامەکەدا سوپاسی خۆپیشادەرانی کەنەدایان کرد کە سیاسەتی  چەوتی ئەردوگان و حزبی ئاکەپە سەبارەت بە دەستگیرکردنی پەرلەمانتارانی کورد  ڕسوا و شەرمەزار دەکەن .

لە کۆتاییدا بەشداربووان بە جۆش و خرۆشێکی گەرمەوە بە ئاهەنگ و زەماوەندی کوردی کۆتاییان بە خۆپیشاندانەکە هێنا و بەڵێنیشیاندا خۆپیشاندان بەردەوام دەبێت تا ئەو کاتەی گەلی کورد بە مافە ڕەواکانی خۆی شاد دەبێت و پەرلەمانتارانی هەدەپەش ئازاد دەکرێن .

25 24 22

پـــەیـــوەنــدیــدار