ئەنجومەنی ناوەندی : تا ئەمرۆ حەیدەر شەشۆ هەڤاڵێکی دڵسۆزی یەکێتی بوو لەمەودواش دەبێتە دۆستێکی نزیکی یەکێتی

ئەنجومەنی ناوەندی : تا ئەمرۆ حەیدەر شەشۆ هەڤاڵێکی دڵسۆزی یەکێتی بوو لەمەودواش دەبێتە دۆستێکی نزیکی یەکێتی

ئەمرۆ هەڤاڵ حەیدەر شەشۆ بەفەرمی دەستلەکارکێشانەوەی خۆی وەک ئەندامی ئەنجومەنی ناوەندی پێشکەش بە سکرتاریەتی ئەنجومەنی ناوەندی کرد.

ئەمرۆ دوو شەممە 17/4/2017 هەڤاڵ عادل موراد سکرتێری ئەنجومەنی ناوەندی و هەڤاڵانی سکرتارییەت لە بارەگای ئەنجومەنی ناوەندی پێشوازییان لە هەڤاڵ حەیدەر شەشۆ کرد ، سەرەتا حەیدەر شەشۆ رایگەیاند: شانازی دەکەم کە لەناو ریزەکانی یەکێتی نیشتیمانی کوردستاندا خەباتم کردوە تا ماویشم خۆم بەقەرزاری هەڤاڵ مام جەلال دەزانم کە لە قۆناغێکی سەخت و دژواردا لە وڵاتی سوریا 17 ئەندامی بنەماڵەکەی ئێمەی لە حکومی لە سێدارەدان رزگارکرد.
وتیشی: وەکو ئێزدیەکان سوپاسی جەنابی مام جەلال و یەکێتی نیشتیمانی کوردستان دەکەین کە لەساڵی 1975 تائێستا بەبەردەوامی پشتیوانمان بوون.
هیواشی خواست ئەو پشتیوانەی یەکێتی بۆ ئێزدیەکان بەردەوام بێت و بەڵێنیشیدا کە لەکوردستان و یەکێتی نیشتیمانی کوردستان دوور نەکەوێتەوە بەڵام بەهۆی دامەزراندنی حزبێکی نوێی تایبەت بە ئێزدیەکان کە بەپێی پەیڕەوی ناوخۆی یەکێتی و بەپێی پەیرەوی ناوخۆی ئەو حزبە نوێیەش هیچ کەسێک ناتوانێت لە یەک کاتدا ئەندامی دوو حزب بێت ، لەبەرئەوە داوایی دەست لە کارکێشانەوە لە یەکێتی نیشتیمانی کوردستان دەکەم و هیواشی خواست یەکێتی نیشتیمانی کوردستان وەک هێزێکی سیاسی بەهێز و کاریگەری سەر گۆرەپانی سیاسی کوردستان پشتیگیری حزبەکەیان بکات .
لەبەرامبەریشدا هەڤاڵ عادل موراد سکرتێری ئەنجومەنی ناوەندی و هەڤاڵانی سکرتارییەت دوایی پەسەندکردنی دەست لەکارکێشانەوەی بەرێز (حەیدەر شەشۆ) رایانگەیاند: حەیدەر شەشۆ تا ئەمڕۆ هەڤاڵێکی دڵسۆزی یەکێتی نیشتیمانی کوردستان بوو لەمەودوایش لە چوارچێوەی رێبازەکەی هەڤاڵ مام جەلال کە بڕوابوونە بە ژیانی دیموکراسیانەی سیاسی وەکو دۆستێکی نزیک لە خۆمان مامەڵە لەگەڵ حەیدەر شەشۆ دەکەین .
راشیانگەیاند: یەکێتی نیشتیمانی کوردستان بەردەوام دەبێت لە پشتگیرکردنی ئێزدیەکان هەروەک چۆن لەسەرەتای دامەزارندنیدا بەئەرکی سەرشانی خۆی زانیوە لەمەودوایش بەدەردەوام دەبێت لەسەر ئەو رێبازە .
سکرتارییەتی ئەنجومەنی ناوەندی هیوای سەرکەوتنیان بۆ حەیدەر شەشۆ لەم ئەرکە نوێیەدا بۆ خواست.

پـــەیـــوەنــدیــدار