قسەیەک لە یادی (٤٢) ساڵەی یەکێتیدا، جیا لە پیرۆزبایی!

قسەیەک لە یادی (٤٢) ساڵەی یەکێتیدا، جیا لە پیرۆزبایی!

یادی یەکێتی تەنها یادێکی راگوزەرو ئاسایی نیە، هێزێک خاوەنی سەدان سەروەری گەورەو هەزاران پێشمەرگەی شەهید و سەدان سەرکردە و فەرماندەی قارەمان و هەزاران زیندانی و کەم ئەندام بێت، بێگومان ناکرێت یادێکی ئاسایی بێت، هەر بۆیە لەم یادەدا بە ئەندازەی  پیرۆزباییەکان چاوی ڕەخنە و هەڵسەنگاندنی بابەتی و شرۆڤە و شیکاری سیاسی بۆ دۆخی ناوخۆی حیزبەکە و هەڵوێست و دیدو تێڕوانیەنەکانی لەمەڕ کێشەکانی هەرێم و دۆخی عێراق و ڕوداوەکانی ناوچەکە گرنگ و بگرە پێویستیشە، پێم وایە ڕوداوەکانی یەک ساڵی ڕابردوو یەکێتی، ئەهێنێت لەئاستیا هەڵوەستەیەک بکرێت و دوور لە کار و کاردانەوەی نابەجێی و نازانستی، هەڵسەنگاندیان بۆبکرێت، لەلایەکی تریش ناکرێت خۆمان بە پیرۆزباییەو سەرقاڵ بکەین و پانتای ڕوبەری رەخنەش بۆ کەس و لایەنی تری جێبهێڵین، کە بێ ئەنداز رەخنەی بێمان و دوور لە هەموو مۆڕاڵێک لەم هێزە ئەگرن.

یەکەم: لە ئاستی کێشە ناوخۆیەکانیدا، ئەم هێزە توشی دەرگیریەکی قورس بوە، نەک تەنها کێشەیەکی پێی چارەسەرنەکراوە بگرە کێشەکان زیاتر بوون و دۆخێکی سایکۆلژی دژواریشی لای کادرو جەماوەرەکەی دروست کردوە، ئەم دۆخە تەنها زیانی بەیەک ڕیزی یەکێتی نەگەیاندوە، بەڵکوو کاریگەری نەگەتیڤیشی لەسەر کۆی هەوڵەکانی بۆ چارەسەرکردنی کێشەکانی هەرێم دروست کردوە، رەنگە لەناوچەکەدا هیچ هێزێک بە ئەندازەی یەکێتی خاوەن گوتاری جیاواز نەبێت، رۆژانە دید و وتاری ناکۆک و دژ بەیەکمان گوێی لێ ئەبێت، هەندێک جار جیاوازێکان بەئەندازەی جیاوزی دووهێزی سیاسی یان زیاتریش دەر ئەکەون، ئەوی ئێستا شاراوەنیە ئەوەیە کێشەکان زیاتر تێکەڵ بەبەرژەوەندی بوەو کێشەی بیر و بڕواو دیدی سیاسی کە مترین ڕوبەری بەر ئەکەوێت، بێ دوودڵیش تەوای هەڤاڵانی سەرکردایەتی ناکرێت لە یەک چوارچێوەدا وێنا بکرێن، ناکرێت هەڤاڵێک هەموو مەهامێکی بازرگانیبێت و هیچ ناوچەیەک و بابەتێکی بازرگانی نەمابێت بەرژەوەندی ئەمی تێدا نەبێت، بەڵام بەیەک چاو سەیربکرێت لە گەڵ هەڤاڵێک کە کەمترین بەرژەوەندی لەدەوری خۆیی کەس وکاری کۆکردبێتەوە،لە تای یەک تەرازووی ویژدان دا دابنرێین.

دووەم: لە سەر ئاستی جەماوەری، یەکێتی بە هۆیی ململانێکانێ وە دۆخێکی وای خولقاندوە، کە زۆر جار بەئاستەم ئەم جەماوەرەت پێ جیا ئەکرێتەوە لە بنکەی جەماوەری گۆڕان لە باشور و پەیەدە لە ڕۆژئاواو پەکەکە لە باکوور، بێگومان ئەم هەڵوێستە، ڕووداوەکان دەریان خستوە بە ئەندازەی ئیجابیاتەکانی سلبیاتی بە دواوە بوە، چونکە زۆر جار هەڵوێستی ئەم لایەنانە شایەنی ڕەخنەی جدی و هەڵوەستەی توندبوە، بەڵام نەتوانراوە لەبەر ئەم دۆخە هەڵوێستی ڕاشکاوانە دەرببڕێت، نەبوونی یەک دید و ڕوئیای یەیکگرتوو هۆکاربوە شەقامی یەکێتی زۆرجار پەیوەستی زیاتری ئەجندای ئەو هێزانەبێت زیاتر لە هێزەکەی خۆیان.

سێیەم: یەکێتی لە ئاست کێشەکانی نێوان گۆڕان و پارتی، بێ ئەندازە هەوڵی بێ ئەنجامی داوە، لە کاتێکدا ئەم کارە کاری یەکێتی نیە، بەڵکو کاری کاسایەتیە نیشتیمانێکانە لە سەرئاستی کوردستان، نمونەی لەم جۆرە هەوڵانەش لە مێژووی ململانێکاندا زۆرن، چونکە دەبوو یەکێتی هەر لە سەرەتاوە کە کێشەکان بەبن بەست گەیشتن، هەڵوێستی ڕاست و رەوانی خۆیی هەبوایە و کچ وکوڕی خۆی نەکردایەتە قورابانی کوڕ و کچی کەس، لەوەش زیاتر لە ئاست و ناوەندی جیاوازی ئەم دووهێزە ناکۆکیکارەدا، زۆرجار وتەو قسەی بێوێنە ناشرین و نادۆستانە لە هەمبەر ئەم هەڵوێستانەی یەکێتی بیستراوەو بینراوە، یەکێتی هێزی تکا و ناوبژیوانکار نەبووە و نابێت، بەڵکوو هەمیشە وەک هێزی بڕیارە قورسەکان بینراوە، لەم ڕوەشەوە پێویستە ڕێکەوتنامەی دەباشان کە بناغەکەی مام دای ڕشتوە لە پێناو سەقامگیری زیاتردا سەرباری سەرنج و تێبینێکانیش جێبەجێبکرێت و ئەگەربشکرێت فراوان بکرێت.

چوارەم: پارتی دیموکراتی کوردستان بە ئاشکراو بێ پەردە، بۆتە بەشێک لە ئەجندای تورکیا و لە میدیاکانی خۆشیدا نەک نەیشاردۆتەوە بەڵکوو بە شانازیەکی زۆرەوە لە سەری ئەدوێن، کاریگەرێکانی ئەم وڵاتە تەنها لە ئاستی سیاسیدا ڕەنگی نەداوەتەوە،  بەڵکوو ئێستا جل و بەرگ و خۆراک تورکین، دراماو بەرنامەکان تورکین، سەفەرەکانمان بۆ تورکیان، داهات و پارەی ئەم وڵاتە بەشی شێری بۆ تورکیایە، کەچی ئەم تورکیایە لە کاتی مەترسێکانی سەر هەولێر ئامادەنەبوو بە یەک سەربازیش کۆمەکمان بکات،  لەلایەکی تر سیاسەتی تاک ڕەهەندی پارتی لە بارەی زۆر کەیس و پێشهات و نەگەڕانەوەی بۆ یەکێتی ومۆنۆپۆڵکردنی بەشی زۆری دەسەڵاتەکان، بەشێکی تری ئەو کاریگەریە نەرێنیانە دەرئەخات، بەڵام یەکێتی وەک ئەوەی پێویستە نەیتوانی وە دۆستێکی باشی ئێران بێت و لە بەرژەوەندی گەلەکەمان بەکاری بهێنێت، بە ئاراستەی چارەسەرکردنی کێشەکانمان لە گەڵ بەغداد، لە کاتێکدا ئێران لە کاتی مەترسێکانی سەرهەولێر، یەکەمین وڵات بوو هەرێمەکەمانی لە ڕوخان پاراست، بێگومان ئەم دۆخە نالەبارەی کوردستان و تێکچوونی باڵانسی هێز وا ئەکات من لە سەر ئەم گەمە ناوچەیانە قسە بکەم و ئەم دابەشکاریە بە باش بزانم، ئەگەرنا دەبوو هەموو هێزەکان ‌لە چوارچێوەی یەک ئەجندای ستراتیژی نیشتیمانیدا کۆببونایەتەوە نەک ئەم پەرتەوازەییەی ئێستا، راست ئەوە یە تورکیا و ئێران بە حەجمی خۆیان مامەڵەیان لەگەڵ بکرێت و شێوازی مامەڵەکردنەکەش لە پەڕلەمانەوە بڕیاری لە بارەوە بدرایە.

لە کۆتایدا پێم وایە هیچ قسەیەک نەماوە بۆ وتن هیچ تێزێک نەماوەتەوە بۆ نوسین، هەموو شتەکان چەند بارەن، چیتر هەق نیە باسی فکر و فەلسەفە و ڕێبازی مام جەلال بکەن، بەڵکوو کاتێتی ئەم تێزانەی مام لە قسەوە بگۆڕێن بۆکردار، کادر ماندوە دۆخی ئابوری یەکێتێکان چەندین قات خەراپترە لە هێزەکانی تر، لە ناوچەکانی زۆنی زەرد و هەندێک جاریش لە زۆنی سەوز، غەدری ئاشکرا لە کادرەکانمان ئەکرێت، پەیڕەوو پڕۆگرام پێشێلکراوە فرە بۆچوونین، لە هەموو هێزێک ئەچین هێزەکەی مام نەبێت، کەواتە با ئەم یادە لە شوێنی پیرۆزبایی بکەیە یادی بەخۆدا چونەوە، بیکەینە یادی هەستانەوە و یادی بوژاندنەوەی بیرو باوەڕ، ئەگەر مام تان خۆش ئەوێت لە بەر خاتری مام، ئەگەر ڕێزی شەهیدەکانتان لایە لە بەر خاتری ئەوان ئەگەریش دڵتان بۆ داهاتویی نادیاری ئەم میللەتەش ئەسوتێت، لە بەرخاتری کوردستان، واز لە بەشێک لە بەرژەوەندێکانتان بهێنن و یەکێتێکەی مام بکەنەوە بە هێزەکەی جارانی مام.

فەهمی بورهان ئەندامی مەکتەبی ڕێکخستن

پـــەیـــوەنــدیــدار